ფიჯელი უნივერსალი ლევანი ბოტია 16 ივნისს საქართველოს ნაკრების წინააღმდეგ ვერ ითამაშებს.

29 წლის „ლა როშელის“ მორაგბემ 30 მარტს, ჩემპიონთა თასის მეოთხედფინალში, „სკარლეტსთან“ 17:29 წაგებული მატჩის 25-ე წუთზე ტრავმა მიიღო და შესაცვლელი შეიქმნა. გამოკვლევამ აჩვენა, რომ მას მუხლის ჯვარედინი მყესი აქვს გაწყვეტილი და მოედანს მინიმუმ 6 თვე ვერ გაეკარება.

აღსანიშნავია, რომ ბოტიას ანალოგიური ტრავმა 2016 წელსაც ჰქონდა.

ლევანის რამდენიმე პოზიციაზე შეუძლია თამაში - შერკინების მესამე ხაზში და შუამარბად. ის „ლა როშელში“ 2013 წლიდან თამაშობს, ამავე წელს მიიწვიეს ეროვნულ გუნდში და 11 მატჩში 4 ლელო გაიტანა.