ქართული

17:12 | 5.04.2018 | ნანახია 1877 - ჯერ

შარიქაძე და ცუცქირიძე: ახალი თანაგუნდელების მოლოდინი

საფრანგეთის პრო დ2-ში მოასპარეზე "ორიაკის" ხელმძღვანელობამ სამომავალსეზონო კონტურები მოხაზა. კლუბის პრეზიდენტმა კრისტიან მიიეტმა გუნდის დამრიგებლებსა და სელექციონერებს ისეთი რაზმის ჩამოყალიბება დაავალა, რომელიც უახლოეს წლებში "ორიაკს" ახალ, ხარისხობრივად მაღალ დონეზე გაიყვანს.

ახალ მორაგბეებთან კონტრაქტები მალე გაფორმდება. ბირთვი უკვე გამოიკვეთაო, ამბობენ, მაგრამ ოვერნელებს კიდევ სურთ გაძლიერება. ფაქტი კი ისაა, რომ მომავალი სეზონის "ორიაკი" ამჟამინდელისგან საგრძნობლად განსხვავებული იქნება. "ორიაკის" მთავარი საკადრო დანაკარგია "მონტობანში" ერთბაშად 3 მოთამაშის გაშვება - გუნდს ტოვებენ ცნობილი სამოელ-ზელანდიელი, მეორე-მესამეხაზელი უტუ მანინოა, და ორი ცენტრი: სამოელი რობერტ ლილომაიავა და ახალზელანდიელი ალექს ლუატუა. გარდა ამისა, ქართველი ბურჯი ნიკოლოზ ხატიაშვილი სუპერ რაგბის "სანვულვზში" გადავიდა.

უნდა აღინიშნოს, რომ ორიაკელთა უფროსობის მთავარი იმედები მათ შორის ქართველებსაც უკავშირდებათ. თუკი ამპლუით ასევე ცენტრი, ბორჯღალოსანთა კაპიტანი მერაბ შარიქაძე ისედაც იყო სასტარტო შემადგენლობის უცვლელი წევრი, ახლა მას მთლიანად გუნდის ერთ-ერთი ლიდერის ფუნქციაც დაეკისრება. მთავარია, ბუკა მალე გამოჯანმრთელდეს.

მესამე ხაზში კი "ორიკის" პრეზიდენტსა და მწვრთნელებს ძველი-ახალი კაცის ეიმედებათ. საქმე ისაა, რომ გიორგი ცუცქირიძე "ორიაკს" გასულ შემოდგომაზე შეუერთდა, მაგრამ ეს იმდენად გვიან მოხდა, რომ პრო დ2-ის განაცხადში მისი შეყვანა უკვე შეუძლებელი იყო. 21 წლის ბორჯღალოსანმა თავისი შესაძლებლობები ესპუართა გუნდში თავის პირველივე მატჩში გამოავლინა და ზამთარში კლუბის შეფობამ მას ახალი, 3-წლიანი ხელშეკრულება დაუდო. კონტრაქტის პირველ წელს გიორგის კვლავაც ესპუარის სტატუსი ექნება, ოღონდ მთავარ გუნდში თამაშის უფლებით, 2019-2021 წლებში კი, ახალგაზრდა მესამეხაზელი უკვე ჟიფის (ფრანგთან გათანაბრებული) სტატუსით ისარგებლებს.

სხვამხრივ, "ორიაკის" ხელმძღანელობა აცხადებს, რომ სულ მალე კონტრაქტები გაფორმდება რამდენიმე უცხოელ მორაგბესთან: 1 კვაჭთან, 1 მეორეხაზელთან, 2 მესამეხაზელთან და 2 უნივერსალ უკანახაზელთან - ორივეს შეუძლია 10-15 ნომრებზე ერთნაირი წარმატებით თამაშიო. სატრანსფერო სეზონი 20 აპრილს დაიწყება, ასე რომ, შარიქაძისა და ცუცქირიძის ახალი თანაგუნდელების ვინაობას მალე შევიტყობთ.


კომენტარები (0)

კომენტარის გამოქვეყნებისთვის, გთხოვთ გაიაროთ ავტორიზაცია ან რეგისტრაცია

FB ავტორიზაცია
0.09528