თუ აქამდე ყველაფერი მხოლოდ ვარაუდების დონეზე იყო, ახლა ოფიციალური სახე მიიღო - რუსეთის რაგბის კავშირმა რუმინეთთან გამართული 2017 და 2018 წლების რაგბი ევროპის ჩემპიონატის შეხვედრები გაასაჩივრა.

გარდა ამისა, რუსები ითხოვენ გაირკვეს, წესების სრული დაცვით მოხდა თუ არა ესპანეთისა და ბელგიის ნაკრებში მოთამაშე „ლეგიონერების“ ნატურალიზაცია.

რუსეთის რაგბის კავშირის სპორტული დირექტორი სერგეი მარკოვი დეტალების შესახებ ყვება:

„ფაკაოსილეასთან დაკავშირებული ინფორმაციის გაჟღერების შემდეგ, ნაადრევი დასკვნებისგან თავი შევიკავეთ. დაწვრილებით შევისწავლეთ საკითხი, ასევე მსგავსი პრეცედენტები. ახლა შემიძლია თამამად განვაცხადო, რომ ტონგელს რუმინეთის ნაკრებში თამაშის უფლება არ ჰქონდა! სწორედ ამიტომ, ფაქტებზე დაყრდნობით ვითხოვთ, რომ გაუქმდეს მისი მონაწილეობით ჩატარებული მატჩების შედეგები“ - ამბობს მარკოვი.

ფაქტებით ზურგგამაგრებული წერილები „მსოფლიო რაგბსა“ და „რაგბი ევროპაში“ რუსეთის რაგბის კავშირმა 29 მარტს გააგზავნა.

„ძალიან ბევრი ნატურალიზირებული მოთამაშეა ესპანეთისა და ბელგიის ნაკრებშიც. ჩვენ მათ შესახებ სრულფასოვანი ინფორმაცია არ გვაქვს, თუმცა რადგან ეჭვები გაჩნდა, „მსოფლიო რაგბს“ მათთან დაკავშირებული ინფორმაციის გარკვევაც ვთხოვეთ“ - დაამატა მარკოვმა.