ლეგენდარული უელსელი ბურჯი ადამ ჯონსი, მიმდინარე სეზონის დასრულებისთანავე კარიერას დაასრულებს.

აღნიშნული ინფორმაცია, ადამმა BBC–ის გაანდო: “საოცარი კარიერა მქონდა, ფანტასტიკური 18 წელი იყო. ბევრი ადამიანი ალბათ ფიქრობდა, რომ უკვე პენსიაზე ვიყავი გასული, რადგან ამ სეზონში არ მითამაშია, თუმცა “ჰარლექუინსში” მოთამაშე-მწვრთნელის როლი მაქვს. სეზონის ბოლოს მოთამაშის კარიერას ოფიციალურად დავასრულებ”, - განაცხადა 37 წლის ბურჯმა, რომელიც მომავალი სეზონიდან “ჰარლექუინსის” შერკინების მწვრთნელი იქნება.

ჯონსი უელსის ნაკრებში 2003-2014 წლებში თამაშობდა, “დრაკონების” კვართი 95-ჯერ მოირგო და 2 ლელო გაიტანა. გარდა ამისა, მას უთამაშია ბრიტანელი და ირლანდიელი ლომების (2009, 2013) და “ბარბაროსების” მაისურით.

რაც შეეხება საკლუბო დონეს, 2003-2014 წლებში “ოსპრეიზში” ჩატარებულ 195 მატჩში 3 ლელო დადო, შემდეგ “კარდიფ ბლუზში” ერთი სეზონი დაჰყო და 24 თამაშში მიიღო მონაწილეობა, ხოლო 2015 წლიდან მოყოლებული ინგლისურ “ჰარლექუინსში” ირიცხება და 30 თამაშში 1 ლელოს გატანა მოახერხა.