რუსულენოვანმა სარაგბო საიტმა rugger.info-მ სენსაციური სტატია გამოაქვეყნა. უფრო სწორად, ეს სტატია კი არა, ვარაუდების კრებულია, ამიტომაც, ჩვენი კომენტარის გარეშე, ამ ტექსტის სრულ თარგმანს შემოგთავაზებთ.

"სასწრაფოდ! ეტყობა, რუმინეთის ნაკრებმა ტონგელი განაცხადში არალეგალურად შეიყვანა!

შესაძლოა, "მუხებმა" არათუ 2019 წლის მსოფლიო თასის საგზური დაკარგონ, არამედ ევროპის 2017 წლის საჩემპიონო ტიტულიც.

როგორც rugger.info-მ რუსეთის რაგბის ფედერაციასთან დაახლოებული წყაროებიდან შეიტყო, ესაა სიონე ფაკაოსილეა, რომელიც "ბაია მარეში" შუამარბად თამაშობს.

მოთამაშეს "მუხებში" დებიუტი 2017-წელს ჰქონდა, რუმინეთში გატარებული 3 წლის შემდეგ, სადაც 2014-ში გადაბარგდა. მაგრამ ჰქონდა კი ამის უფლება?

2013-2014 წლების სეზონის 7-კაცას მსოფლიო სერიის პირველ ეტაპზე, რომელიც 2013 წლის 12-13 ოქტომბერს გოლდ კოსტში გაიმართა, სიონე ფაკაოსილეა ირიცხებოდა ტონგელთა 7-კაცა ნაკრების შემადგენლობაში.

სამწუხაროდ, თანდართული ვიდეო (ტონგა-კენია) არცთუ მაღალი ხარისხისაა და მეორე ტაიმის დასაწყისში შეცვლაზე შესული ფაკაოსილეა ეკრანზე ახლო ხედით მხოლოდ ორჯერ ჩნდება, თან ორივეჯერ - არცთუ საუკეთესო რაკურსით.

მსოფლიო სერია "მსოფლიო რაგბის" ოფიციალური ტურნირია. მასზე ასპარეზობის შემდეგ ტონგელს მოქალაქეობასთან ერთად აი ასე, ერთი ხელის მოსმით, ნაკრების შეცვლაც როდი შეეძლო. ამისთვის იყო საჭირო საერთაშორისო შეჯიბრებებში ტონგელთა ღირსების დაცვისგან თავის 3-წლიანი შეკავება, შემდეგ კი, ოლიმპიური კვალიფიკაციის გავლა, გზად 7-კაცაში სულ ცოტა ორი ტურის თამაშის ფონზე. ამის გაკეთება მას არ შეეძლო, რადგან რიო დე ჟანეიროს ოლიმპიური თამაშების შესარჩევი ტურნირი რუმინელთათვის იყო 7-კაცას ევროპის 2015 წლის გრან-პრი.

ბოლოდროინდელი მაგალითები: არცთუ დიდი ხნის წინ რუსეთის ნაკრებში სწორედ ამ გზით მოვიდა ანტონ რუდოი, ხოლო ანალოგიური დარღვევისთვის "დათვები" 2003 წლის მსოფლიო თასის კვალიფიკაციას ჩამოაშორეს.

რუმინეთის რაგბის ფედერაციამ ან დააიგნორა მოთამაშის ნატურალიზების წესები, ან უბრალოდ არ იცოდა (?!), რომ ფაკაოსილეა 7-კაცას თამაშობდა.

თუმცა, არსებობს ნიუანსები. რუმინეთის სუპერლიგის საიტზე, ტონგელის გადასვლის შესახებ გამოქვეყნებულ სტატიაში ვხედავთ, რომ მისი დაბადების თარიღი ბოლომდე არ ემთხვევა მის პროფილებს საიტებზე itsrugby.co.uk, worldrugby.org და რამდენიმე სხვაზეც - თვე განსხვავებულია. სეხნია-მოგვარე?

თუკი აღმოჩნდება, რომ ეს ერთიდაიგივე ადამიანია, რუმინეთის ნაკრებს "რაგბი ევროპის" 2017 წლის ჩემპიონატზე ტექნიკური წაგებები საქართველოსთან, რუსეთთან და ბელგიასთან ჩაეთველება. ასევე 2018 წლის ყველა მატჩშიც.

თუ ასეთი შედეგი დადგა, რუსეთი პირდაპირ გავა 2019 წლის მსოფლიო თასზე (თუ ესპანეთისა და ბელგიის ნაკრებთა მატჩის გაპროტესტებულ შედეგს არ გააუქმებენ). ესპანეთი დარჩება მეორე ადგილზე, ხოლო საქართველო 2017 წლის საჩემპიონო ტიტულს დაისაკუთრებს.

ალტერნატიული ვარიანტი: რუმინეთი უბრალოდ მოიხსნება მსოფლიო თასის შესარჩევი ტურნირიდან. ამ შემთხვევაში კვალიფიკაციის ლიდერად ესპანეთი გამოცხადდება (22 ქულა), ხოლო რუსეთი მეორე ადგილზე გავა (20 ქულა).

ყველა ვარიანტში, მომავალი გამოძიება იქნება კოლოსალური დარტყმა რუმინული რაგბის იმიჯზე, რომელიც ბელგიისა და ესპანეთის მატჩის მსაჯობის მერე ისედაც არცთუ საუკეთესო მდგომარეობაშია".