გუშინ ცნობილი გახდა, რომ ახალგაზრდა ქართველი მორაგბე გიორგი ჯავახია სეზონის დასრულებისთანავე ტოპ 14-ის "ლიონს" დატოვებდა და კარიერას პრო დ2-ის "ორიაკში" განაგრძობდა, რომელშიც საქართველოს ნაკრების კაპიტანი მერაბ შარიქაძე და მესამეხაზელი გიორგი ცუცქირიძე ირიცხებიან.

21 წლის მორაგბეს უმალ დავუკავშირდით და საინტერესო საუბარი გამოგვივიდა. აღსანიშნავია, რომ გიორგიზე თითქმის ყველა უცხოურ სარაგბო გამოცემას უწერია, რომ პოზიციით მესამეხაზელია, თუმცა მასთან საუბარში აღმოვაჩინეთ, რომ გიორგის მეორე ხაზში თამაში ურჩევნია, მაგრამ გუნდური ინტერესებიდან გამომდინარე, უარს არც ზემოხსენებულ პოზიციაზე თამაშს ამბობს და "ლიონის" ძირითად გუნდშიც სწორედ ფლანკერის (6-7 ნომრები) ამპლუაზე მოუწია თამაში.

ვისაუბრეთ სხვა საკითხებზეც, რასაც ქვემოთ გაეცნობით.

- როგორც ჩვენთვის ცნობილი გახდა, კარიერას "ორიაკში" განაგრძობთ. კონტრაქტის დეტალები როგორია?

- კონტრაქტს რაც შეეხება, მე 22 წლის ვხდები და ერთი წელი ესპუარის კონტრაქტით თამაში მომიწევს, ხოლო შემდეგი ორი სეზონი პირველ გუნდთან ანუ პრო-კონტრაქტი მექნება. პირველი კი ესპუარი, მაგრამ ძირითად გუნდთან ვიქნები, როგორც მითხრეს და როგორც კონტრაქტშია აღნიშნული, თუმცა შეიძლება 1-2 თამაში ესპუარებში მომიწიოს ჩემი შესაძლებლობლების უკეთ დასამტკიცებლად.

- "ლიონიდან" წამოსვლის მიზეზზე გკითხავთ, ალბათ სათამაშო პრაქტიკას უკავშირება არა?

- "ლიონში" მესამე სეზონია ვთამაშობ, პირველ წელს ოთხი თამაში ვითამაშე პირველ გუნდში. შემდეგ 20-წლამდელთა ნაკრებში ვიყავი, სადაც კუნთი გავიწყვიტე. რეაბილიტაცია ძალიან გაიწელა, 5 თვე ვერ ვვარჯიშობდი და მოსამზადებელი ეტაპიც ვერ გავიარე პირველ გუნდთან, ამის შემდეგ ესპუარებში მომიწია თამაში, ხოლო ჩემთვის მნიშვნელოვანი პირველ გუნდში ბევრი თამაშია, რაც "ლიონში" ვერ გამოვიდა.

- "ორიაკში" მერაბ შარიქაძე და გიორგი ცუცქირიძე დაგხვდებიან, რამაც ადაპტაცია უფრო უნდა გაგიადვილოთ. იმოქმედა ქართველების ფაქტორმა, როდესაც "ორიაკში" გადასვლის გადაწყვეტილება მიიღეთ?

- რა თქმა უნდა იმოქმედა, ძალინ გამიხარდა, როდესაც გავიგე "ორიაკში" გადავიდოდი, რადგან მერაბ შარიქაძესთან, ჩვენი ნაკრების კაპიტანთან ერთად მომიწევდა ვარჯიში და იმედი მაქვს, ვითამაშებ მის გვერდით, რაც შეეხება გიორგი ცუცქირიძეს, მას ასაკობრივი ნაკრებებიდან ვიცნობ და ძალიან კარგი ურთიერთობა გვაქვს. კიდევ იყო რამდენიმე გუნდის ვარიანტი, მაგრამ იქ ქართველები არ თამაშობენ და როდესაც გავიგე, რომ "ორიაკიც" იყო დაინტერესებული და 3-წლიან კონტრაქტს მთავაზობდა კარგი პირობებით, მერაბის და გიორგის ფაქტორიდან გამომდინარე "ორიაკში" გადასვლა ვამჯობინე.

- ჩვენი მეორე ჟურნალისტი სულ რამდენიმე დღის წინ ესაუბრა ნიკოლოზ ხატიაშვილს, რომელმაც განაცხადა, რომ "ორიაკში" ბევრი ძლიერი მორაგბე თამაშობს, რის ხარჯზე აპირებ იმ კონკურენციის დაძლევას, რომელიც "ორიაკშია'?

- ჩემი სტილის თამაშით, გუნდში კომუნიკაციით, ჩემი ძალით და ქართული სულისკვეთებით. დარწმუნებული ვარ, მაქსიმუმს გავაკეთებ იმისთვის, რომ ჩემი ადგილი დავიმკვიდრო.

- ბიოგრაფიაში და უცხოური ვებგვერდების პროფილებზე გიწერიათ, რომ ფლანკერი ხართ, თუმცა...

- კი ფლანკერის პოზიციაზეც ვთამაშობ და 8 ნომრადაც, სადაც გუნდს დავჭირდები იქ ვითამაშებ. პრო დ2-ში "ლიონის" რიგებში 6 და 7 ნომრებზე ვითამაშე, მაგრამ ჩემი მიზანი მეორე ხაზში თამაშია.

- მაშინ შემდეგი კითხვა სწორედ მეორე ხაზზე გვექნება. ჩვენს ნაკრებს მეორე ხაზში შედარებით შეზღუდული რესურსი აქვს, რაც ყველასთვის ცნობილია. აქედან გამომდინარე, "ორიაკში" თავის დამკვირდრების შემთხვევაში, 2019 წლის მსოფლიო თასზე თამაშზე თუ ფიქრობთ?

- ძალიან მაგარი, ძლიერი და გამოცდილი მოთამაშეები გვყავს მეორე ხაზში, მაგრამ ცოტა. 2019 წელს რაც შეეხება, იაპონიაში არამგონია ვიყო. ჩემი მიზანი პირველ რიგში არის, რომ ბევრი ვივარჯიშო, "ორიაკის" პირველ გუნდში ადგილი დავიმკვიდრო და მსოფლიო თასის შემდეგ, ალბათ მომეცემა შანსი, რომ ჩემი შესაძლებლობები დავამტკიცო ნაკრებშიც.

- საფრანგეთში წლებია თამაშობთ და კარგად ხედავთ, თუ რამდენი ქართველია სხვადასხვა ლიგებში. ბოლო პერიოდში კი ფრანგებმა ლეგიონერებზე შეზღუდვები დააწესეს და კიდევ უფრო გამკაცრებას ვარაუდობენ. თქვენი აზრით, ასეთ შემთხვევაში რამდენად ექნებათ ახალგაზრდა ქართველ მორაგბეებს საფრანგეთში მოხვედრის შანსი?

- ძალიან რთული იქნება, რადგან ყველა ფრანგული გუნდი აქცენტს აკეთებს "ჟიფ" მოთამაშეებზე. "ჟიფი" როგორც მოგეხსენებათ, ფრანგ მოთამაშესთან გათანაბრებული უფლებებით სარგებლობს, რაც ადრე სამ წელში შეგეძლო გამხდარიყავი, ახლა ხუთ წლამდე გაზარდეს, რაც აკადემიებში ლეგიონერების ჩამოსვლას ძალიან ართულებს.

- როგორ ფიქრობთ, ასეთ შემთხვევაში , რა არის ქართული რაგბის განვითარებისთვის გამოსავალი?

- გამოსავალი ის იქნება, რომ შიდა ჩემპიონატი გაძლიერდეს საქართველოში, რადგან შეიძლება ბევრი ქართველი ვერ წავიდეს საფრანგეთში ან სხვა ძლიერ ქვეყანაში. შესაბამისად, უნდა განვითარდეს და გაძლიერდეს ქართული საკლუბო რაგბი.

- პირველი ნაბიჯები რომ გვითხრათ კარიერის. რამდენი წლის იყავით, რაგბის თამაში რომ დაიწყეთ და რომელ ქართულ კლუბში თამაშობდით?

- რაგბის თამაში 9 წლის ასაკში დავიწყე. ვთამაშობდი სენაკის გუნდ "ჯიხაში". ჩემი პირველი მწვრთნელი იყო მალხაზ კილასონია. რაგბის თამაში დავიწყე ბებიას და ბაბუას რჩევით, რომლებიც ძალინ დამეხმარნენ ყველაფერში. 15 წლის ასაკში ფოთში ვთამაშობდი ორი წელი "ბ" და "ა" ლიგებში, სადაც ჩემი მწვრთნელი იყო ამირან შავგულიძე და შემდეგ პროფესიონალურ დონეზე დავიწყე თამაში - 17 წლის ასაკში ქუთაისის "აიაში" გადავედი, სადაც საფრანგეთში წასვლამდე ვთამაშობდი.

- და ბოლოს, შეგიძლიათ ის თქვათ, რაც მოგესურვებათ და მიმართოთ ხალხს, თქვენს ახლობლებს, გულშემატკივრებს...

- ჩემი "ორიაკში" გადასვლა სიახლეა გულშემატკივრებისთვის. ჩემი ოჯახი და ხალხი, ვინც მიცნობს და მაფასებს, ყველა მადევნებს თვალს და ბევრ სითბოს იჩენს. ამისთვის ყველას მადლობას ვუხდი. მაქსიმუმს გავაკეთებ და ყველაფერს ვიზამ იმისთვის, რომ ჩემს გულშემტკივრებს და მეგობრებს იმედები არ გავუცრუო. მაქსიმუმს ვიზამ, რომ ის ხალხი გავახარო ჩემი წარმატებებით, ვინც მგულშემატკივრობს.