მაკქოუ, პარისე, კვირიკაშვილი და სხვები

ერთა თასი

17:40 | 15.03.2018 | ნანახია 4596 - ჯერ

შაბათს და კვირას ევროპა ზამთრის სანაკრებო სეზონს ხურავს. ექვს ერში ბოლო ტურია და გადასაწყვეტიც დიდი აღარაფერია - ირლანდიის ჩემპიონობაც ნაადრევად გადაწყდა და იტალია ხის კოვზის მფლობელი რომ გახდებოდა, ეს სულაც ტურნირის დაწყებამდე ვიცოდით. ეს ხუმრობით, თუმცა, საქმეს ახლა ისეთი პირი უჩანს, რომ "აძურის" კაპიტანი სერჯიო პარისე "ცენტურიონი" წაგებული მატჩების მხრივაც გახდება. დღეის მონაცემებით, არგენტინული წარმოშობის ლეგენდარულ იტალიელს 133 სანაკრებო კეპი აქვს მოხვეჭილი, რომელთაგან მისმა გუნდმა 99 წააგო. ხოლო შაბათს იტალიის ნაკრები შოტლანდიელებს უმასპინძლებს...

რახან "ცენტურიონი" ვახსენეთ, ბარემ ამ თემას გავყვებით და მოგახსენებთ, რომ ბოლო მსოფლიო თასის შემდეგ ნაკრებიდან წასულმა ახალზელანდიელთა ლეგენდარულმა კაპიტანმა რიჩი მაკქოუმ სანაკრებო თამაშების მხრივ თავისი ლიდერობა ჯერჯერობით არავის დაუთმო და ეს მდგომარეობა წლეულს ხელუხლებელი დარჩება - რიჩი 148 კეპით ტიტანთა სიის ლიდერია!

მეორეა ლეგენდარული ირლანდიელი ბრაიან ოდრისკოლი 141 კეპით, მესამეზე კი, უფროსი თაობის ავსტრალიელი სუპერვარსკვლავი ჯორჯ გრეგანია (139). აი, მომდევნო ადგილებზე კი, გეთინ ჯენკინსი და პარისე არიან შესაბამისად 134 და 133 მატჩით. უელსელისა რა მოგახსენოთ, 37 წლისაა, "კარდიფ ბლუზში" ანტონ ფეიქრიშვილის პარტნიორია და ნაკრებში მეორე წელია, აღარ ეძახიან, თორემ სანაკრებო კარიერის დასრულებაზე ოფიციალურად ხმა არ ამოუღია. აი, პარისე კი შაბათს ექვს ერში შოტლანდიელებსაც დაუხვდება, ზაფხულის ტესტებსაც ითამაშებს, შემოდგომისაც, და საერთოდ, 2019 წლის მსოფლიო თასისთვის ემზადება. ანუ, 34 წლის იტალიელს უკვე მიმდინარე წლის ბოლოს შეუძლია ამ დიადი ცხრილის მესამე საფეხურზე ასვლა, ხოლო გაისად მსოფლიო თასამდეც დაეწევა მაკქოუს...

მოქმედ მოთამაშეთაგან კიდევ ერთი უელსელი, 32 წლის ალან ვინ ჯონსია ამ ასპექტში პერსპექტიული. უელსის ნაკრების ამჟამინდელი კაპიტანი მშვენიერ ფორმაშია, კარიერის დასრულებაზე არც ის ფიქრობს და ამასობაში 125 მატჩამდე კი ავიდა. ხოლო ქურციკთა სიამაყე ბრაიან ჰაბანა ამ სეზონის შემდეგ კარიერას ასრულებს და მის ანგარიშზე დღეს არსებული 124 კეპი ამაყად შევა ისტორიაში.

კვირას კი "ევროპის რაგბის" ჩემპიონატი სრულდება და ამ ჩვენს მეორე დონესაც ჰყავს მოქმედი ცენტურიონები. რუმინელთა ლიდერი, მგეზავი და ბომბარდირი ფლორინ ვლაიკუ 111-ე სანაკრებო მატჩს გამართავს, ჩვენი ფულბეკი მერაბ კვირიკაშვილი - 110-ეს, კიდევ ერთი ბორჯღალოსანი, შუამარბი დავით კაჭარავა - 109-ეს. საქართველოს კიდევ ერთი ცენტურიონი ჰყავს - გიორგი ჩხაიძე, რომელსაც მიმდინარე ჩემპიონატში მონაწილეობა არ მიუღია, თუმცა კარიერის დასრულების შესახებ არაფერი უთქვამს. და რაც შეეხება პოტენციურ კანდიდატებს, 100 სანაკრებო მატჩთან სხვებზე ახლოს ლაშა მალაღურაძე და გიორგი ნემსაძე არიან. ერთის ანგარიშზე 83 კეპია, მეორის - 80. იმედია, ისინიც მოახერხებენ საოცნებო კლუბში მოხვედრას.

აქვე გთავაზობთ ცენტურიონთა 51-კაციანი კლუბის ოდნავ შემოკლებულ სიას. მუქი შრიფტით გამოყოფილებს სანაკრებო კარიერა არ დაუსრულებიათ.

№	მოთამაშე	ნაკრები	წლები	კეპი
1	რიჩი მაკქოუ	ახალი ზელანდია	2001–2015	148
2	ბრაიან ოდრისკოლი	ირლანდია (133) და ბილ* (8)	1999–2014	141
3	ჯორჯ გრეგანი	ავსტრალია	1994–2007	139
4	გეთინ ჯენკინსი	*უელსი (129) და ბილ (5)**	2002–	134
5	სერჯიო პარისე	იტალია	2002–	133
6	კევინ მეალამუ	ახალი ზელანდია	2002–2015	132
7	რონან ოგარა	ირლანდია (128) და ბილ* (2)	2000–2013	130
8	სტივენ მური	ავსტრალია	2005–2017	129
9	ვიქტორ მეტფილდი	სამხრეთ აფრიკა	2001–2015	127
10	ალან ვინ ჯონსი	უელსი (116) და ბილ* (9)	2006–	125
11	ბრაიან ჰაბანა	სამხრეთ აფრიკა	2004–	124
12	მარტინ კასტროჯოვანი	იტალია	2002–2016	119
=	ჯეისონ ლეონარდი	ინგლისი (114) და ბილ* (5)	1990–2004	119
14	ფაბიენ პელუსი	საფრანგეთი	1995–2007	118
=	ტონი ვუდკოკი	ახალი ზელანდია	2002–2015	118
16	ადამ ეშლი-კუპერი	ავსტრალია	2005–	116
=	ნეითან შარპი	ავსტრალია	2002–2012	116
18	პოლ ოკონელი	ირლანდია (108) და ბილ* (7)	2002–2015	115
19	მარკო ბორტოლანი	იტალია	2001–2015	112
=	დენ კარტერი	ახალი ზელანდია	2003–2015	112
21	როს ფორდი	შოტლანდია (110) და ბილ* (1)	2004–	111
=	ფილიპ სელა	საფრანგეთი	1982–1995	111
=	ჯონ სმიტი	სამხრეთ აფრიკა	2000–2011	111
=	ჯორჯ სმიტი	ავსტრალია	2000–2013	111
25	რორი ბესთი	ირლანდია	2005–	110
=	სტივენ ჯონსი	უელსი (104) და ბილ* (6)	1998–2011	110
=	ფლორინ ვლაიკუ	რუმინეთი	2006-	110
28	ჟან დე ვილიერსი	სამხრეთ აფრიკა	2004–2015	109
=	მერაბ კვირიკაშვილი	საქართველო	2003-	109
=	კრის პატერსონი	შოტლანდია	1999–2011	109
=	კირან რიდი	ახალი ზელანდია	2008-	109
32	დავით კაჭარავა	საქართველო	2006-	108
37	ალესანდრო ძანი	იტალია	2005–	103
42	კეტელინ ფერკუ	რუმინეთი	2005–	102
42	ვაშკუ უვა	პორტუგალია	2003–	101
48	გიორგი ჩხაიძე	საქართველო	2002-	100