გამარჯვება ყოველთვის კარგია. საქართველოს ნაკრებმა დაგეგმილი გამარჯვება ამჯერადაც მოიპოვა და რაგბი ევროპის ჩემპიონატის ტიტულისკენ მიმავალ გზაზე კიდევ ერთი ნაბიჯი გადადგა, თუმცა გვერდს ვერაფრით ვერ ავუვლით იმ ხარვეზებსა და პრობლემებს, რომლებიც დღევანდელ მატჩში გამოჩნდა და ამაზე აუცილებლად ვისაუბრებთ.

“მიხეილ მესხზე” საქართველოს ნაკრების მეტოქე ესპანეთი იყო, რომელმაც ორი კვირის წინ მადრიდში რუმინეთის წინააღმდეგ ისტორიული გამარჯვება მოიპოვა და 2019 წლის მსოფლიო თასის საგზურთან ერთ ნაბიჯშია. “ლომებს” გასულ წელთან შედარებით, საგრძნობლად აქვთ მომატებული. ამის მიზეზი სამწვრთნელო შტაბის და მთლიანად იქაური რაგბის კავშირის სწორი მუშაობის შედეგია, რომლის წყალობითაც ესპანეთი გაცილებით ანგარიშგასაწევი ძალა გახდა. გარდა ამისა, პირენეის ნახევარკუნძულელთა წარმატებაში დიდი წვლილი მიუძღვის ნატურალიზირებულ მოთამაშეებს, რომლებიც მრავლად არიან, უმეტესად, ესპანეთი-საფრანგეთის მოსაზღვრე რაიონებიდან არიან (უმეტესობას წინაპრები ესპანელები ჰყავდათ, ხოლო ზოგიერთი მეორე მსოფლიო ომის პერიოდში იქნენ გადასახლებულნი) და საფრანგეთის ჩემპიონატის სხვადასხვა ლიგებში (უმეტესად პრო დ2-ში და ფედერალ 1-ში) თამაშობენ.

როგორც ესპანელთა მთავარმა მწვრთნელმა სანტიაგო სანტოსმა განაცხადა, რომ ესპანეთს აქამდე ასეთი ძლიერი გუნდისთვის თავი არასდროს მოეყარათ და წელს ამის გაკეთება მოახერხეს. თუმცა, “ლომების” გურუმ საწყის ორ მატჩში ნათამაშები შემადგენლობა ფაქტობრივად მთლიანად შეცვალა და მხოლოდ სამი მოთამაშე დატოვა, რისთვისაც მას ნამდვილად ვერ გავამტყუნებთ, რადგან რაგბი ევროპის ჩემპიონატის ბოლო ორი მატჩი “ლომებისთვის” გადამწყვეტია: თუ ბელგიას და გერმანიას დაამარცხებენ 2019 წლის მსოფლიო თასზე ითამაშებენ. ამრიგად, ესპანელებმა თბილისში გადახალისებული შემადგენლობით ითამაშეს.

საქართველოს ნაკრების მთავარი მწვრთნელის მილტონ ჰეიგი თამაშამდე ამბობდა, რომ ესპანეთი ძალიან გაძლიერდა და მათთან ყურადღებით თამაში იყო საჭირო. ამაზე აზრზე გახლდათ კაპიტანი გიორგი ნემსაძეც, რომლის აზრითაც “ლომები” ძალიან კარგი გუნდი არიან.

მიუხედავად ამისა, შესაძლოა, “ბორჯღალოსნების” რიგებში მაინც იყო მოტივაციის პრობლემა, რადგან მეტოქე მთლიანად გადახალისებული შემადგენლობით თამაშობდა. თანაც, წინა ორი მატჩი იმდენად იოლად იყო მოგებული, რომ ბიჭები შეიძლება ცოტათი მოდუნდნენ კიდეც. იმაზე ლაპარაკი კი ადრეც ყოფილა და კვლავ იქნება, რომ საქართველოს ნაკრები ამ ტურნირისთვის უკვე გადაზრდილია...

მოკლედ ზემოხსენებული თუ სხვა ფაქტორების გამო, თამაში საკმაოდ რთული და მძიმე გამოდგა. შესაძლოა, ჩვენს ნათქვამში არის სიმართლის მარცვალი და სწორედ ამის დამსახურებაა, რომ ბევრ შეცდომას ვუშვებდით, გვიჭირდა შეტევების გაშლა და მეტოქის მწყობრი დაცვის გარღვევა. ესპანელთა სასახელოდ კი უნდა ვთქვათ, რომ შესუსტებული შემადგენლობის მიუხედავად ძალიან კარგი თამაში აჩვენეს და ბევრი გულშემატკივარი ამით გააკვირვეს. განსაკუთრებით უნდა ითქვას, რომ მშვენივრად ასპარეზობდა ესპანელთა ხაზი და ხშირ შემთხვევაში რიცხობრივი უპირატესობის მოპოვებასაც ახერხებდნენ.

შეხვედრა ქართველთა შეტევებით დაიწყო და ლელოს დადებასთანაც ახლოს ვიყავით, მაგრამ მსაჯმა ბურთის დამიწება ვერ დაინახა და შერკინება დაინიშნა. მეტოქე რამდენჯერმე დავაჯარიმეთ, თუმცა კარში არ ვარტყამდით და ლელოს დადებას ვცდილობდით, თუმცა ესპანელებმა თავი ძალიან კარგად დაიცვეს და ბოლოს “ბორჯღალოსნებმა” უპირატესობის გამოყენება და კარში დარტყმა გადაწყვიტეს: სოსო მათიაშვილმა მე-10 წუთზე ჯარიმა ზუსტად შეასრულა და ანგარიში გაიხსნა.

მიხეილ ნარიაშვილმა 25-ე წუთზე მშვენივრად ითამაშა, რაქში ბურთს ჩაუჯდა და მეტოქე დააჯარიმა, რომელიც მათიაშვილმა კვლავ ზუსტად შეასრულა და ანგარიში გაზარდა. 30-ე წუთზე კი ჩვენ დავჯარიმდით და მატიო პენიუშონმა მიმდინარე რაგბი ევროპის ჩემპიონატში პირველი ქულები გაგვიტანა. ტაიმის ბოლოს კი ისევ ქართველებმა დააჯარიმეს მეტოქე და მათიაშვილმა კვლავ ზუსტად დაარტყა – 9:3.

მეორე ნახევარიც ქართველთა შეტევებით დაიწყო, 48-ე წუთზე ლელოს დადებასთან ძალიან ახლოს ვიყავით, თუმცა ესპანელებმა წესების დარღვევით თავი დაიცვეს და ლელო არ დაგვადებინეს. ქართველებმა 5-იანთან შერკინება აირჩიეს, მეტოქე პირველივე შერკინებაში დააჯარიმეს და შემდეგ ისევ შერკინება აირჩიეს, რომლის ჩაქცევის გამოც მსაჯმა საჯარიმო ლელო ჩაგვითვალა.

ქართველებმა აქტიურობა განაგრძეს და ორ შემთხვევაში ლელოს დადებასთან ძალიან ახლოს ვიყავით: 67-ე წუთზე ხელდახელ მშვენიერი შეტევა გავშალეთ და სანდრო თოდუა უკანასკნელ მომენტში გადაიყვანეს კიდეზე, ხოლო 70-ე წუთზე ოთარ გიორგაძეს ლელოდან ორიოდე მეტრის მოშორებით წინ გაუვარდა ბურთი.

შეხვედრის ბოლოს შეტევისთვის ესპანელებმაც მოიცალეს და შვიდი წუთის განმავლობაში ქართველები საკუთარ 22-ში გამოკეტეს, მძლავრად მიეძალეს და ქართველები რამდენჯერმე დააჯარიმეს, რასაც ბოლოს 79-ე წუთზე დავით კაჭარავას გასინბინება მოჰყვა, ესპანელებმა ჯარიმა კვლავ გაათამაშეს და საბოლოოდ ამდენი მიძალების შემდეგ ლელო მაინც გაიტანეს: აფა’ესე ტაულიმ რაქიდან აიტაცა ბურთი და ლელოში გადადო, გარდასახვა კი პელიუშონმა შეასრულა ზუსტად.

გაშვებულმა ლელომ ქართველები ძალიან გააბრაზა. სოსო მათიაშვილმა ცენტრიდან განაახლა თამაშიდა ბურთი მეტოქის 22-ში გადაკიდა, ოვალი ესპანელებმა ჩაიგდეს ხელში, მაგრამ შეცდომა დაუშვეს და არაზუსტი გადაცემის შემდეგ ბურთი ლელოდან ათიოდე მეტრის მოშორებით აუტში გადავიდა. ქართველებმა მოწოდებული აუტი მოიგეს, მოლი არ დააყენეს და კოლელიშვილმა კოშაძეს გამოუტანა ბურთი, რომელიც ლელოდან ორი მეტრის მოშორებით შეაჩერეს, მაგრამ გიორგი მელიქიძის შეჩერება სამმა ესპანელმა ვერ შეძლო და “სტად ფრანსეს” ბურჯმა ნაკრების კვართით პირველი ლელო გაიტანა, რომელიც მათიაშვილმა გარდასახა და საქართველომ 23:10 იმარჯვა.

რაც შეეხება რაგბი ევროპის ჩემპიონატის სხვა მატჩებს, რუმინეთის ნაკრებმა საკუთარ მოედანზე რუსეთი 25:15 დაამარცხა, ხოლო ბელგიამ შინ გერმანია 69:15 გაანადგურა და ფაქტობრივად, ბოლო ადგილოსნის ვინაობა გაირკვა.

საქართველო – ესპანეთი 23:10 (9:3)

საქართველო: 2 ლელო – საჯარიმო ლელო (51), მელიქიძე (80+1); 3 ჯარიმა – მათიაშვილი (10; 25; 37); 1 გარდასახვა – მათიაშვილი (80+2)

ესპანეთი: 1 ლელო – აფა’ესე ტაული (80); 1 ჯარიმა – პელიუშონი (31); გარდასახვა – პელიუშონი (80)

სატურნირო ცხრილი