3 ნოემბერს საქართველოს ეროვნული სარაგბო გუნდი შევარდენის სანაკრებო ბაზაზე ნოემბრის ტესტებისთვის მზადებას შეუდგა.

მილტონ ჰეიგის განკარგულებაში მყოფმა “ბორჯღალოსნებმა” დილით დარბაზში ივარჯიშეს, საღამოს ვარჯიში კი მინდორზე გამართეს.

ნაკრების სანოემბრე რაზმი პარასკევს გახდა ცნობილი. შერჩეულ მოთამაშეთა შორის ორი ახალგაზრდა მორაგბეა: მურაზ გიორგაძე (“არმაზი”) და გიორგი აფციაური (“აია”). გიორგაძეს ორი კეპი აქვს მოხვეჭილი. მისი დებიუტი 2014 წლის თბილისის თასზე, ესპანეთის ნაკრების წინააღმდეგ გამართულ მატჩზე შედგა.

აფციაურს, რომელსაც ეროვნული ნაკრების კვართი ჯერ არ სცმია, თითქმის ყველა ასაკობრივ ნაკრებში აქვს ნათამაშები. წლეულს სექტემბერში მან თბილისის “კავკასიელების” შემადგენლობაში ევროპული საკლუბო რაგბის “ჩელენჯ ქაპის” საკვალიფიკაციო სერიაში იასპარეზა.

როგორც მოგეხსენებათ. ტრავმების გამო, წლევანდელ ნოემბრის კამპანიაში ნაკრებს ვერ დაეხმარებიან მამუკა გორგოძე, შალვა სუთიაშვილი (ორივე მუხლის ტრავმა) და დავით ზირაქაშვილი (ტვინის შერყევა). ტრავმის შემდეგ რეაბილიტაციას გადიან ვასილ კაკოვინი, ჯაბა ბრეგვაძე, თედო ზიბზიბაძე, ანტონ ფეიქრიშვილი და დავით ხინჩაგიშვილი.

გუშინ გამთენიიისას თბილისში ტონგელი “ზღვის არწივებიც” ჩამოვიდნენ, რომლებიც 8 ნოემბრის ტესტისთვის მზადებას ავჭალის სარაგბო სტადიონზე გააგრძელებენ.

მთავარი მწვრთნელის, მანა ოთაის განცხადებით, თბილისამდე გუნდმა რამდენიმე დღიანი შეკრება დიდ ბრიტანეთში გაიარა და რომ საქართველოში კარგად მომზადებული ჩამოვიდა.

შეგახსენებთ, რომ ტონგა 2015 წლის მსოფლიო თასის C ჯგუფში ჩვენი ნაკრების ერთ-ერთი კონკურენტია. საქართველომ და ტომგამ უკანასკნელად 1999 წელის 28 მარტს, მსოფლიო თასის რეპეშაჟში თბილისში ითამაშეს. ის შეხვედრა “ბორჯღალოსნებმა” ერთი ქულის სხვაობით – 28:27 მოიგეს, მაგრამ მანამდე ტონგაში 37:6 წაგების გამო, მაშინ ფინალურ ეტაპზე გასვლა ვერ მოვახერხეთ.

ფოტოები >>>

ბორჯღალოსნების ნოემბრის ტესტ სერიის რაზმი: