“ბათუმმა” სამხრეთ აფრიკელი გარემარბი, ბერნადო ბოთა დაიმატა. 29 წლის მორაგბეს აჭარული კლუბის რიგებში დებიუტი შაბათს, “ბაგრატთან” გასვლაზე მოგებულ (26:10) მატჩში ჰქონდა.

ბერნადო ბოთას საკმაოდ საინტერესო კარიერას აქვს და მას საუკეთესო სარაგბო საკლუბო ჩემპიონატში, სუპერ რაგბიში უთამაშია. ის 2010 წლის “ზე რაგბიში” “ლაიონსის” შემადგენლობაში 2-ჯერ გამოჩნდა.

გარდა ამისა, 2009-2010 “გოლდენ ლაიონსის” ღირსებას იცავდა, სადაც ვოდაკომის თასზე (ქარის თასის შემდეგ, საუკეთესო პირველობა სამხრეთ აფრიკაში) 8 შეხვედრა ჩაატარა და 4 ლელო გაიტანა. 2013 წელს “გრიფონსში” გადავიდა, სადაც ქარის თასის პირველ დივიზიონში 5-ჯერ ითამაშა, ხოლო 2014 წლიდან “სტევალ პუმასს” შუერთდა და ამ დროის განმავლობაში ვოდაკომის თასზე გამართულ 9 მატჩში 4 ლელო დადო, ქარის თასზე 12-ჯერ გამოჩნდა და 1 ლელოთი გამოირჩა, ხოლო პროვინციის თასზე 12-ჯერ ირაგბა და ასევე 1 ლელო გაიტანა.

2010-2013 წლებში ბოთამ 15-კაცა რაგბიზე დროებით უარი თქვა, რადგან სამხრეთ აფრიკის რაგბის კავშირთან კონტრაქტი გააფორმა და 7-კაცა ნაკრებში თამაშობდა. ის “ქურციკების” კვართით 7-კაცა რაგბის მსოფლიო სერიებში თამაშობდა, სადაც ჯამში 39 შეხვედრა ჩაატარა და მეტოქეები 10-ჯერ დაალელოვა. ბერნადოს უთამაშია სამხრეთ აფრიკის 15-კაცა ნაკრების 19 წლამდელთა გუნდშიც.