კონტინენტის ფარის 1/4 ფინალური ეტაპის პირველ მატჩში, “ბათუმი” საკუთარ მოედანზე “ტიმიშოარა სარასენსს” დაუხვდა და 5-ქულიანი სხვაობით დამარცხდა.

შეხვედრა ძალიან დაძაბული, თუმცა ნაკლებად სანახაობრივი გამოდგა, რაშიც უდიდესი წვლილი საშინელ ამინდს მიუძღვის. მთელი თამაშის განმავლობაში ძლიერად წვიმდა, მინდორი მალევე ატალახდა, რამაც მატჩის სცენარზეც ძალიან იმოქმედა. ამინდი ცუდად აისახა სატელივიზიო ტრანსლაციაზეც, კადრი ხშირად ქრებოდა და მაყურებელმა თამაშის ყურება სრულფასოვნად ვერ შეძლო.

გუნდებს გაშლილი თამაში უჭირდათ, ბევრი იყო ტექნიკური წუნი და ბურთი წინ ხშირად უვარდებოდათ. საბოლოო ჯამში, ასეთ პირობებში თამაშისთვის უკეთესად მომზადებული, უფრო გამოცდილი “ტიმიშოარა” აღმოჩნდა, რომელიც სათამაშო უპირატესობას ფლობდა და შეხვედრის სასურველი შედეგით დასრულებაც შეძლო.

პირველი ტაიმი ფრედ დასრულდა. 33-ე წუთზე ჯოდი როუზმა არეკნით ანგარიში გახსნა, რომელსაც სამ წუთში ჯარიმით ბახვა კობახიძემ უპასუხა და გუნდები გასახდელში ყაიმით გავიდნენ.

მეორე ნახევარი სტუმართა შეტევებით დაიწყო, რამაც შედეგი მალევე გამოიღო: 49-ე წუთზე მსაჯმა წესების დარღვევისთვის გიორგი თხილაიშვილი გაასინბინა. რუმინელებმა ჯარიმა აუტში გადაიტანეს, კარგად მოაწოდეს და მოლი ჩამოაყალიბეს, რომელსაც ანდრეი რედოი მოწყდა, მისი შეჩერება ვერავინ მოახერხა და შეხვედრის ერთადერთი ლელო გაიტანა. გარდასახვა სტუმრებს გაუცუდდათ.

დარჩენილ დროში გუნდებმა სამ-სამი ქულის მოპოვება შეძლეს. 58-ე წუთზე სხვაობა ბახვა კობახიძემ შეამცირა, ხოლო 75-ე წუთზე გაბრიელ კონაკემ საბოლოო ანგარიში დააფიქსირა – 6:11.

განმეორებითი შეხვედრა რუმინეთში ერთ კვირაში გაიმართება და “ბათუმს” შემდეგ ეტაპზე გასასვლელად 5 ქულაზე მეტით მოგება დასჭირდება.

ბათუმი – ტიმიშოარა სარასენსი 6:11 (3:3)

ბათუმი: 2 ჯარიმა – კობახიძე (33; 58)

ტიმიშოარა სარასენსი: 1 ლელო – რედოი (50); 1 არეკნი – როუზი (33); 1 ჯარიმა – კონაკე (75).