სარაგბო კლუბი “არმია” დაშლის პირასაა. დიდი 10-ის კლუბს 2018 წლის იანვრიდან, თავდაცვის სამინისტრომ დაფინანსება შეუწყვიტა და კლუბი უსახსროდ დარჩა.

ზემოხსენებული ფაქტი კლუბის პრეზიდენტმა და მორაგბეებმა გააპროტესტეს. ისინი თავდაცვის სამინისტროსთან შეიკრიბნენ და აქცია გამართეს. “არმიას” მორაგბეები მინისტრთან შეხვედრას და სიტუაციაში გარკვევას ითხოვდნენ.

როგორც ირკვევა, კლუბის წევრებს კონტრაქტი სეზონის ბოლომდე აქვთ გაფორმებული და “არმიას” დაშლის შემთხვევაში, ისინი უმუშევრად დარჩებიან, რადგან საქართველოს ჩემპიონატში სატრანსფერო ფანჯარა დახურულია.

კლუბის პრეზიდენტის ზოდიკო ფარქოსაძის თქმით, თავდაცვის სამინისტროს მათთვის დაფინანსების შეწყვეტის თაობაზე არ უცნობებია და ისინი საქმის კურსში არ ჩაუყენებია.

აღნიშნულ სიტუაციაზე ისაუბრა, რაგბის კავშირის საშეჯიბრო კომიტეტის ხელმძღვანელმა ნიაზ მამრიკიშვილმა: “დაახლოებით 7-10 დღეში საბოლოოდ გაირკვევა შექმნილი ვითარება, თუ რა მდგომარეობაში აღმოჩნდება “არმია”, დაფინანსებით თუ დაფინანსების გარეშე. ამის შემდეგ, ამ საკითხს გამგეობა აუცილებლად განვიხილავთ და რაღაც გამოსავალი უნდა მოვნახოთ, რომ ამ კლუბმა ჩემპიონატის დასრულება მოახერხოს”.

განცხადება გაავრცელა თავდაცვის სამინისტრომაც, რომელსაც აქვე გთავაზობთ: "მოგახსენებთ, რომ ეროვნული თავდაცვის აკადემიის ა(ა)იპ "სპორტული კლუბი არმიას" ხელმძღვანელობა, ჯერ კიდევ 2017 წლის 5 მაისიდან ინფორმირებული იყო, რომ 2018 წლიდან დაფინანსება შეუწყდებოდა. საქართველოს ეროვნული თავდაცვის აკადემიამ აღნიშნული გადაწყვეტილების შესახებ მას ოფიციალურად აცნობა. შესაბამისად, განცხადებები იმის შესახებ, რომ კლუბის ხელმძღვანელობას ინფორმაცია არ ჰქონდა, სიმართლეს არ შეესაბამება. ამას ადასტურებს ის გარემოებაც, რომ კლუბის ხელმძღვანელობას ეროვნული თავდაცვის აკადემიისთვის 2017 წლის ბოლოს ბიუჯეტის პროექტი, საშტატო ნუსხა და სახელფასო განაკვეთი არ წარუდგენია. 2017 წლის განმავლობაში ეროვნული თავდაცვის აკადემიის ფინანსების მართვის სამმართველოს არაერთხელ ჰქონდა კომუნიკაცია "არმიას" ფინანსისტთან (ქ/ნ ნინო ზედგენიძესთან), სადაც მას ყოველივე ზემოაღნიშნული დეტალურად განემარტა. აღნიშნული ფაქტი ასევე ცნობილი იყო "არმიას" პრეზიდენტისთვის ბ/ნ ზოდიკო ფარქოსაძისთვის. სარაგბო კლუბ "არმიას" წლიური დაფინანსება 400 ათას ლარს შეადგენს. აქვე მოგახსენებთ, რომ თავდაცვის უწყების პრიორიტეტებში, ამ ეტაპზე, არ შედის სპორტული კლუბების დაფინანსება. მიუხედავად იმისა, რომ საქართველოს თავდაცვის სამინისტრომ კლუბის დაფინანსების შეწყვეტის შესახებ გადაწყვეტილება ერთი წლის წინ მიიღო, გასულ წელს კლუბს სეზონის დასრულების შესაძლებლობა მაინც მიეცა."