ქართული საკლუბო რაგბისთვის სადებიუტო ევროსეზონი უკვე წარმატებულია. “ბათუმმა” კონტინენტის ფარის ჯგუფური ეტაპის ბოლო ტურის მატჩში საკუთარ მოედანზე “ტიმიშოარა სარასენსს” სძლია და პლეი-ოფის საგზური დამსახურებულად მოიპოვა.

მთლიანობაში, აჭარული გუნდი მთელი ტურნირის განმავლობაში ძალიან კარგად გამოიყურებოდა და გამოუცდელობა რომ არა, შეიძლებოდა ყველა თამაშიც მოეგო. ჩვენმა გუნდმა ძალიან კარგი თამაში აჩვენა საკუთარ მოედანზე “ჰაიდელბერგის” წინააღმდეგ და დამაჯერებლად 33:16 იმარჯვა. ასევე ორჯერ ძალიან ახლოს ვიყავით იტალიაში მოგებასთან, თუმცა “როვიგოსთან” და “ვიადანასთან” ჩატარებული შესანიშნავი ტაიმების შემდგომ, ძალა და გამოცდილება დაგვაკლდა და ორივეჯერ ერთნაირი ანგარიშით 27:31 დავმარცხდით.

უმნიშვნელოვანესია, რომ დაშვებული შეცდომები სათანადოდ იქნას გაანალიზებული და ამის გამოსწორება მოხდეს. ბათუმელთა სამწვრთნელო შტაბმა, დავით გუგუშვილის ხელმძღვანელობით აშკარად ბევრი იშრომა, სათანადო დასკვენები გამოიტანა და გადამწვეტ მატჩში აჭარლებმა საკმაოდ ძლიერ “ტიმიშოარასთან” გაიმარჯვეს.

შეხვედრა ჩვენი გუნდისთვის ცუდად დაიწყო, მე-7 წუთზე სტუმართა მიძალება ქევინ ლეიტერსის ლელოთი დასრულდა, რომელიც ტევიტა მანუმუამ გარდასახა.

“ბათუმელებმა” ცუდი დასაწყისის შემდეგ, ნელ-ნელა თამაშის დალაგება მოახერხეს და 23-ე წუთზე ბახვა კობახიძემ ჯარიმით სხვაობა შეამცირა. ტაიმის დასკვნითმა 10 წუთმა კი მთლიანად მასპინძელთა დომინირებით ჩაიარა: ბათუმელები მეტოქის 22-ში დამკვიდრდნენ და ბექა ურჯუკაშვილმა ლელოში შეჭრა და დამიწება მოახერხა, რომელიც მსაჯებმა ვერ დააფიქსირეს და ვიდეორეფერეის არარსებობის გამო ლელო გაუქმნა, თუმცა “ბათუმმა” ლელო მაინც მალე დადო: 5-იანთან შერკინებას მასპინძელთა მიძალება მოჰყვა, რომელიც იმით დასრულდა, რომ ბექა მამრიკიშვილმა ბურთი ლელოში დაამიწა, გარდასახვა კი ბახვა კობახიძემ ზუსტად შეასრულა და ტაიმი 10:7 მოვიგეთ.

პირველი ნახევრის მსგავსად, მეორე ტაიმიც მასპინძელთათვის უსიამოვნოდ დაიწყო: 44-ე წუთზე ტევიტა მანუმუამ რაქიდან აიტაცა ბურთი, შემდეგ ფრთაზე ფეხით გადაკიდა, თავადვე მიჰყვა და თავის გუნდი დააწინაურა, თუმცა გარდასახვა ვერ გაიტანა და ორქულიანი სხვაობა დარჩა.

აჭარლებმა გადამწყვეტი უპირატესობა მაინც მოიპოვეს: 55-ე წუთზე მეტოქის 5-იანთან შერკინება დაინიშნა, რომლიდანაც ხვიჩა ბუჯიაშვილმა გამოიტანა ბურთი და ზურაბ თუთბერიძეს გადააწოდა, რომელმაც მეტოქის დაცვაში შექმნილი სივრცე შესანიშნავად გამოიყენა, მეტოქის ლელოში შევარდა და ძელებს შუა დაამიწა ბურთი, კობახიძეს კი გარდასახვის გატანა არ გასჭირვებია. გადამწყვეტი გამოდგა კობახიძის მიერ 62-ე წუთზე გატანილი ჯარიმა, რომელიც ქართულმა გუნდმა კვლავ შერკინებით მოიპოვა. “ბათუმმა” სერიოზული უპირატესობა მოიპოვა, რადგან მეტოქეს ერთი შედეგიანი შეტევა აღარ ყოფნიდა.

80 წუთი უკვე ამოწურული იყო, როდესაც რუმინელებმა 5-იანიდან მოწოდებული დერეფანი მოიგეს, მოლი ააგორეს და ლელო დადეს, თუმცა ეს აღარაფერს წყვეტდა და “ბათუმმა” 20:17 მოიგო.

პლეი-ოფში ერთმანეთს კვლავ “ბათუმი” და “ტიმიშოარა” შეხვდებიან, რადგან “კალვიზანომ” “როვიგო” 34:0 დაამარცხა, ბონუს-ქულა მოიპოვა და ბურთების სხვაობის ხარჯზე პირველ ადგილზე გავიდა. აღნიშნული დაპირისპირება 13 და 20 იანვარს გაიმართება. ბათუმელები პირველ მატჩს შინ ჩაატარებენ, ხოლო მეორეს რუმინეთში ითამაშებენ.

ამრიგად, ქართული საკლუბო რაგბის დებიუტი უკვე წარმატებულია. “ბათუმი” პირველივე სეზონში პლეი-ოფში გავიდა და კიდევ უფრო დიდი წარმატების ძალიან კარგი შანსი აქვს, რადგან “ტიმიშოარა” უკვე დამარცხებული ჰყავს.

“ბათუმის” ეს წარმატება კი სხვა კლუბებისთვისაც გადამდები უნდა იყოს და იმედია, რომ ამიერიდან სხვებიც ჩაერთვებიან ევროთასებზე და ქართული გუნდები სტაბილურად დაიწყებენ გამოსვლას. წესით ასეც უნდა იყოს, რადგან აჭარული გუნდის წარმატებულმა გამოსვლამ, სხვა კლუბებსაც ასეთივე წარმატება უნდა მოანდომოს და კონტინენტის ფარზე გამოსასვლელად კიდევ უფრო შეეცდებიან საჭირო რესურსის გამონახვას.

ბათუმი – ტიმიშოარა 20:17 (10:7)

ბათუმი: 2 ლელო – მამრიკიშვილი (34), თუთბერიძე (55); 2 ჯარიმა – კობახიძე (23; 62); 2 გარდასახვა – კობახიზე (35; 56)

ტიმიშოარა: 3 ლელო – ლეიტერსი (7), მანუმუა (44), რუსი (81); 1 გარდასახვა – მანუმუა (8)

სატურნირო მდგომარეობა

ვიდეომასალა აღებულია რაგბი ტვ-ის ფეისბუქ გვერდიდან