შაბათს, 16 დეკემბერს, ბათუმის ‘რაგბი არენაზე’ საქართველოს ვიცე-ჩემპიონი ევროპული რაგბის ‘კონტინენტის ფარის’ ჯგუფური ეტაპის დასკვნით ტურში რუმინეთის ჩემპიონ ‘ტიმიშოარა-სარასენსს’ უმასპინძლებს და გამარჯვების შემთხვევაში ‘ბათუმი’ ფლეი ოფში თამაშს დაიბევებს.

ზღვისპირელები შემდეგ ეტაპზე გასვლასთან გასულ შაბათს ძალიან ახლოს იყვნენ, მაგრამ იტალიაში ‘ვიადანასთან’ 22-ქულიანი უპირატესობა ვერ შეინარჩუნეს - 27:31. გუნდის მთავარი მწვრთნელი დავით გუგუშვილი ამას გამოუცდელობას, ტრავმებს და მოკლე სათადარიგოთა სკამს უკავშირებს.

„ამ დონეზე თამაშის გამოცდილების ნაკლებობის შედეგად, იტალიაში მეორედ დავთმეთ მოგებული შეხვედრა. ‘კონტინენტის ფარი’ ჩვენთვის ახალი ტურნირია და რაც უფრო მეტი ქართული კლუბი მიიღებს მასში მონაწილეობას, ქართული საკლუბო რაგბი მით უფრო წინ წავა. სამწუხაროდ, ‘ვიადანასთან’ ჩატარებული ძალიან კარგი 50 წუთის შემდეგ, დასკვნით ნახევარ საათში შეცდომები დავუშვით და უპირატესობა ვერ შევინარჩუნეთ. რომ არა ეს შეცდომები, იტალიიდან გამარჯვებული დავბრუნდებოდით და ფლეი ოფის საგზურიც განაღდებული გვექნებოდა.

გარდა გამოუცდელობისა, წარმატების მიღწევაში ხელი შეგვიშალა მომრავლებულმა ტრავმებმა. ჩვენ არ გვყავს თანაბარძალოვანი შემადგენლობა, რის გამოც 23-კაციანი განაცხადის დაკომლექტება და შეცვლების შემდეგ იგივე რითმის შენარჩუნება გვიჭირს“ - ამბობს გუგუშვილი.

მიუხედავად ამისა, ‘ბათუმი’ დასკვნითი ტურის წინ „ბ“ ჯგუფში პირველ ადგილს ინარჩუნებს და მდევრებს 1 (‘კალვიზანო’), 2 (‘პადოვა’) და 4 (ლისაბონის უნივერსიტეტი) უსწრებს. რადგან ფლეი ოფში ორი მოწინავე გადის, შემდეგი მატჩის ნებისმიერი სხვაობით მოგება ჯგუფური ბარიერის დაძლევის ტოლფასი იქნება. შანსი სხვა შემთხვევაშიც რჩება, ოღონდ ეს მეტოქეთა მიერ ნაჩვენებ შედეგებზე იქნება დამოკიდებული.

‘ტიმიშოარა-სარასენსი’ ტურნირის ერთ-ერთი ყველაზე ძლიერი გუნდია, მან სამივე განვლილი შეხვედრა მოიგო და ფლეი ოფში გასვლაც დაბევებული აქვს, თუმცა ის დასკვნითი მატჩის მოგებით ჯგუფში პირველი ადგილის შენარჩუნებას ეცდება. გუგუშვილი მომავალ შეხვედრაში შანსებს თანაბრად აფასებს:

„იტალიაშივე ვთქვით, რომ განვლილ შეხვედრას ვივიწყებთ და ვიწყებთ მზადებას რუმინელებთან მაჩისთვის. ვნახეთ ‘ტიმიშოარას’ მატჩების ვიდეოები და ის ამ ტურნირის უდაო ფავორიტია. სამწუხაროა, რომ მათთან უხერხული პოზიციიდან გვიწევს თამაში და ეს ჩვენზე წნეხს აძლიერებს. მაგრამ მათ საკუთარ მოედანზე ვხვდებით, სადაც ტრიბუნები სავსე იქნება და ბიჭებს მხარდაჭერა არ მოაკლდებათ. ვფიქრობ, ეს ფაქტორი ამ ურთულეს შეხვედრაში შანსებს ათანაბრებს. შაბათს მაქსიმუმს გავიღებთ და მოედანს ნებისმიერ შემთხვევაში თავაწეული დავტოვებთ. გვაქვს იმედი, რომ ეს მონდომება შედეგის მომტანიც იქნება“.

სამწუხაროდ, ‘ბათუმი’ მომავალ შეხვედრას კვლავ ტრავმების ფონზე ხვდება. ‘ვიადანასთან’ მატჩის შემდეგ ტრავმირებული მოთამაშეების რიცხვი კიდევ უფრო გაიზარდა:

„შეკრებაზე შევედით და მომავალი თამაშისთვის ვემზადებით. სამწუხაროდ, თანაბრძალოვანი 23 კაცის მოძებნა ჩვენთვის კვლავ პრობლემად რჩება. გიორგი თედორაძე იტალიაშიც გვყავდა, მაგრამ ტრავმა ვერ მოიშუშა და ვერ ვათამაშეთ. შინ დაბრუნების შემდეგ მას ჩვენთან არ უვარჯიშია. განვლილ მატჩში დაშავდა ირაკლი კვანტიძე. მან მხრის ძვალი დაიზიანა და არა მხოლოდ ამ კვირაში, არამედ დიდი ხნით დაგვაკლდება. რუმინელებთან პირველხაზელის გამოკლება სამწუხარო ამბავია. სხვა მოთამაშეებსაც, განსაკუთრებით ხაზში მიკრო-ტრავმები აწუხებთ. ოპტიმალური შემადგენლობის ძიებაში ვართ და ვეცდებით სასტარტო 15 და შეცვლები დავაბალანსოთ“.

‘რაგბი არენაზე’ შეხვედრა 15 საათზე იწყება. ტურის სხვა მატჩებში ‘კალვიზანო’ ‘როვიგოს’ მასპინძლობს, ‘პეტრარკა’ ‘ვიადანას’ მიიღებს, ხოლო ლისაბონის უნივერსიტეტი ‘ჰაიდელბერგს’ დაუხვდება. პორტუგალიაში მატჩს ქართველი მსაჯები გაუძღვებიან. რეფერი შოთა თევზაძეა, რომელსაც კიდეებიდან სულხან ჩიხლაძე და ონისე მოგელაშვილი დაეხმარებიან.

რაგბის კავშირის პრესსამსახური