მსოფლიო რაგბიმ მონაკოში გამართულ დაჯილდოვების ყოველწლიურ საღამოზე, სხვადასხვა ნომინაციებში გამარჯვებულები გამოავლინა.

როგორც მოგეხსენებათ, წლის საუკეთესო ლელოს წოდებისთვის ოთხი ნომინანტი იბრძოდა, რომელთა შორის ერთ-ერთი საქართველოს ნაკრების ახალგაზრდა ჰავბექი გელა აფრასიძე გახდათ. სამწუხაროდ, გელამ გამარჯვების მოპოვება ვერ შეძლო და მას არგენტინელმა ხოაკინ ტუკულეტმა აჯობა, რომელმაც წლის საუკეთესოდ აღიარებული ლელო ივნისის ტესტებზე ინგლისის ნაკრებს გაუტანა.

2017 წლის საუკეთესო მორაგბე კი ახალზელანდიელი მგეზავი ბოდენ ბარეტი გახდა, რომელმაც აღნიშნული აღიარება ზედიზედ მეორედ მოიპოვა. მან თანამემამულე რიეკო იოანის, ავსტრალიელ იზრაელ ფოლაუს და ინგლისელებს, მარო იტოჯეს და ოუენ ფარელს აჯობა.

წლის საუკეთესო ქალი მორაგბე ასევე ახალზელანდიელი პორტია ვუდმენი გახდა. 26 წლის გარემარბმა, კელი ბრეზის (ახალი ზელანდია), რომენ მენეგერის (საფრანგეთი), საფი ნ’დიაიეს (საფრანგეთი) და ლიდია ტომპსონის (ინგლისი) კონკურენცია დაძლია.

წლის საუკეთესო გუნდად ახალი ზელანდიის ქალთა ნაკრები იქნა დასახელებული, რომელმაც 2017 წლის ქალთა მსოფლიო თასის მოგება მოახერხა.

2017 წლის საუკეთესო მწვრთნელად ინგლისის ნაკრების გურუ ედი ჯონსი დაასახელეს, რომელიც უორენ გეტლანდს (ბრიტანელი და ირლანდიელი ლომების და უელსის ნაკრების მთავარი მწვრთნელი) და სტივ ჰანსენს (ახალი ზელანდიის მთავარი მწვრთნელი) ამჯობინეს.

საუკეთესო ახალბედად “ოლ ბლექსის” ფრთა რიეკო იოანი დასახელდა, რომელსაც რამირო მოიანო (არგენტინა) და დამიან პენო (საფრანგეთი) ეცილებოდნენ.

ირლანდიის ქალთა ნაკრების ყოფილი მორაგბე და ამჟამად მსაჯი ჯოი ნევილი, 2017 წლის საუკეთესო რეფერია.

მორაგბეთა საერთაშორისო ასოციაციის საპატიო ჯილდო ერგოთ ლეგენდარულ ახალზელანდიელ რიჩი მაკქოუს და ინგლისის ქალთა ნაკრების მოთამაშეს რეჩელ ბარფორდს.

ვერნონ პუგის ჯილდო გამორჩეული სამსახურისთვის მიიღო ფრანგმა მარსელ მარტინმა, რომელიც 50 წელზე მეტხანს ემსახურა ფრანგული რაგბის განვითარებას, გახლდათ საერთაშორისო რაგბის საბჭოს წევრი. ის მაისში 83 წლის ასაკში გარდაიცვალა.

ღირსების ჯილდო დაიმსახურა არგენტინელმა ედუარდო ოდერიგომ. ის 15 წლის განმავლობაში მუშაობდა კრიმინალურ ადვოკატად ბუენოს აირესის სასამართლოში. მისი დამსახურება კი იმაში მდგომარეობს, რომ მან ციხეში რაგბის სწავლების იდეა შეიტანა. შეიქმნა ფონდი “ესპარტანოსი”, რომელიც ცდილობდა, რომ პატიმრებს დახმარებოდა საზოგადოებაში რეინტეგრაციისთვის. ყოველკვირეული ტრენინგები დაიწყო 2009 წელს და რვა წლის განმავლობაში 500-ზე მეტმა პატიმარმა მიიღო ამ პროგრამაში მონაწილეობა.

რაც შეეხება 7-კაცა და 7-ქალა რაგბს: მამაკაცთა შორის წლის საუკეთესო მორაგბედ აშშ-ის მოთამაშე პერი ბეიკერი დასახელდა, ხოლო ქალთა შორის ახალზელანდიელი მიჩელა ბლიდი გამოირჩა.