2023 წლის მსოფლიო თასი საფრანგეთში ჩატარდება. მსოფლიო რაგბის საბჭომ აღნიშნული გადაწყვეტილება დღეს ლონდონში გამართული შუალედური შეხვედრის შემდეგ მიიღო.

ფრანგებმა მსოფლიო თასის მასპინძლობის უფლება ორრაუნდიანი სხდომის შედეგად მოიპოვეს. მათ კენჭისყრის გადამწყვეტ ეტაპზე 24 ხმა მიიღეს, ხოლო სამხრეთ აფრიკამ – 15 ხმა. პირველ ტურში კი, საფრანგეთმა 18 ხმა მიიღო, სამხრეთ აფრიკამ 13 ხმა და ირლანდიამ – 8 ხმა.

“ვულოცავ საფრანგეთს 2023 წლის მსოფლიო თასის მასპინძლობის უფლების მოპოვებას. მათ წარმოადგინეს ძალიან ძლიერი და ყოვლისმომცველი განაცხადი, რომელმაც სრულიად დააკმაყოფილა საბჭო.

ჩვენ გვყავდა სამი გამოჩენილი მასპინძლობის მსურველი ქვეყანა, რომელთაც შეუძლიათ ტურნირის უმაღლეს დონეზე ორგანიზება. კანდიდატებს შორის სხვაობა ძალიან მცირე იყო და არჩევანის გაკეთება რთული იყო.

მინდა დიდი მადლობა გადავუხადო ირლანდიას და სამხრეთ აფრიკას თავიანთი განაცხადისთვის. იმედი მაქვს, რომ მომავალში ისინი კვლავ მოისურვებენ მსოფლიო თასის მასპინძლობას. ჩვენ ველით საფრანგეთთან თანამშრომლობის დაწყებას და დარწმუნებული ვარ, რომ 2023 წლის მსოფლიო თასი ძალიან წარმატებული იქნება”, - განაცხადა მსოფლიო რაგბის თავმჯდომარემ ბილ ბომონტმა.

ცნობისთვის, საფრანგეთი მსოფლიო თასს მეორედ უმასპინძლებს. ფრანგებს პირველად ეს პატივი 2007 წელს ერგოთ. გარდა ამისა, 1991 წელს ისინი ინგლისთან, უელსთან, ირლანდიასთან და შოტლანდიასთან ერთად ზემოხსენებული ტურნირის თანამასპინძლები იყვნენ.