კანადის ეროვნული ნაკრების მთავარმა მწვრთნელმა კინგსლი ჯონსმა საქართველოსთან მატჩის წინ გამართულ პრესკონფერენციაზე აღნიშნა, რომ თუკი მისი გუნდი ხვალინდელ შეხვედრაში მეტოქის ძლიერი შერკინების განეიტრალებას შეძლებს, გამარჯვების შანსი ექნება.

კანადელთა თავკაცმა იმ მიზეზებზეც ისაუბრა, რის გამოც ერთი კვირის წინ "მაორებთან" ნათამაშებ სასტარტო 15-ეულში 7 ცვლილება განახორციელა:

„წინა კვირაში მსოფლიო რაგბის საერთაშორისო ფანჯარა არ იყო და ამის გამო ყველა სასურველი მოთამაშე ვერ გამოვიძახეთ. სამაგიეროდ, შანსი მიიღეს ახალგაზრდებმა, რაც ძალიან მნიშვნელოვანია. ახლა ჩვენ ლეგიონერებიც დაგვემატნენ და ტურნეზე უძლიერესი შემადგენლობით წამოვედით.

ჩვენი მიზანია, რომ უახლოესი თამაშები მოვიგოთ და ხვალ მოედანზე სწორედ ამ მიზნით გავალთ. მნიშვნელოვანია, რომ მსოფლიო თასის შესარჩევ თამაშებს (ურუგვაისთან 2018 წლის იანვარ-თებერვალში) გამარჯვებულის ფსიქოლოგიით შევხვდეთ. თუ ურუგვაის ვძლიეთ და მსოფლიო თასზე ჯგუფში საქართველოსთან მოვხვდით, მაშინ ტაქტიკის გადახედვა მოგვიწევს, ხვალ კი, მხოლოდ გამარჯვებისთვის ვიბრძოლებთ“.

უელსელი სპეციალისტი ქართველი ახალგაზრდების შესაძლებლობებს კარგად იცნობს:

„მე მსოფლიო რაგბის 20-წლამდელთა ჩემპიონატის მსვლელობისას კომენტატორი ვიყავი და ახალგაზრდა ქართველი მორაგბეების თამაშით აღფრთოვანებული ვარ. შესაძლოა მათ გამოცდილება არ ქონდეთ, მაგრამ ძლიერი შემსრულებლები არიან. ნებისმიერ შემთხვევაში, ხვალ ჩვენი მიზანი ქართველთა ძლიერი შერკინების განეიტრალებაა და თუ ეს მოვახერხეთ, მოგების შანსი აუცილებლად გვექნება“.

კინგსლი ჯონსი, რომელიც ადრე რუსეთის ნაკრების მთავარი მწვრთნელი იყო, მამუკა გორგოძის არყოფნით გახარებულია, თუმცა იქვე დასძენს, რომ სხვა ქართველი მორკინალებიც არანაკლები სიძლიერის არიან:

„მშვიდად ვარ, რადგან ხვალ მამუკა მოედანზე არ იქნება. წლების განმავლობაში, როდესაც რუსეთის ნაკრებში ვმუშაობდი, ჩვენი მთავარი ამოცანა სწორედ გორგოძის გაჩერება იყო. კარგია მის წინააღმდეგ რომ არ მოგვიწევს თამაში, თუმცა საქართველოში სხვა ძლიერი მორკინალებიც არიან. ჩვენ მეტოქე გუნდის შემადგენლობას პატივისცემით ვეკიდებით“.

მწვრთნელმა კანადელთა ჩავარდნა დროებით მოვლენად მიიჩნია:

„კანადის ნაკრების თამაშებს ბავშვობიდან ვუყურებ. კანადა არ იმსახურებს იმ ადგილზე ყოფნას, სადაც მას ახლა ვხედავთ. ამ გუნდს აქვს უდიდესი პოტენციალი და დარწმუნებული ვარ, სწორი მიდგომით სულ მალე კუთვნილ ადგილს დავიბრუნებთ“.

„ნეკერჩხლების“ კაპიტანი ფილ მაკი იმედოვნებს, რომ ხვალ საქართველოში კარგი ამინდი იქნება და თამაშის ხარისხიც ექვსი თვის წინანდელზე უკეთესი გამოვა:

„კანადაში გამართული მატჩისას ძალიან ცუდი მეტეოროლოგიური პირობები იყო და საკუთარი პოტენციალი ვერცერთმა გუნდმა ვერ გამოავლინა. ჩვენი მატჩის გეგმაა, რომ გავანეიტრალოთ მეტოქის მორკინალები და თამაში გავშალოთ. ჩვენთვის მნიშვნელოვანია, რომ 2018 წლის იანვარ-თებერვალში მსოფლიო თასის კვალიფიკაცია გავიაროთ, თუმცა მანამდე ხვალინდელი თამაშია და მოსაგებად მაქსიმუმს გავიღებთ“.

საქართველოს და კანადის ეროვნულ ნაკრებთა ტესტ-მატჩი 11 ნოემბერს, “დინამო არენაზე”, 18:00 საათზე დაიწყება.

საქართველოს რაგბის კავშირის პრესსამსახური