6 ერის ტურნირს შესაძლოა ახალი სპონსორი ჰყავდეს. სამშენებლო კომპანია “ალტრად ჯგუფი” მზადაა, რომ შოტლანდიის სამეფო ბანკი ჩაანაცვლოს, რომელიც გათამაშების მთავარი პარტნიორია.

გავრცელებული ინფორმაციის თანახმად, მოლაპარაკებები აქტიურ ფაზაში შევიდა და უახლოეს თვეებში შესაძლოა, რომ 6-წლიანი კონტრაქტი გაფორმდეს, რომლის მიხედვითაც 6 ერი 100 მილიონ ევროს მიიღებს.

“ჯონ ფიჰანს (6 ერის აღმასრულებელი დირექტორი) სურს ბევრი ფული, მაგრამ ეს არ არის პრობლემა ჩემთვის. თუ ჩვენ შევთანხმდებით, გავაგრძელებთ გრძელვადიან შრომით ურთიერთობებს”, - განაცხადა “ალტრად ჯგუფის” ხელმძღვანელმა მოჰედ ალტრადმა.

ქართველი გულშემატკივრებისთვის საინტერესო და სასიხარულო ისაა, რომ ის ქართული რაგბის მიმართ დადებითადაა განწყობილი. ალტრადი ფრანგული “მონპელიეს” პრეზიდენტია, სადაც ამჟამად 6 ქართველი ირიცხება (3 ესპუარებში). გარდა ამისა, სირიაში დაბადებული მილიარდელი საქართველოს რაგბის კავშირთან და ქუთაისის “აიასთან” თანამშრომლობს. როგორც ცნობილია, მას სურს, რომ 6 ერის გათამაშებას საქართველოს ნაკრებიც დაემატოს.

გეტყვით, რომ 6 ერის 2018 და 2019 წლების გათამაშების კალენდარი უკვე შედგენილია და შესაბამისად, საქართველოს დამატება ორი წლის განმალობაში გამორიცხულია, შემდეგ კი ვნახოთ...