გაგაცნობთ იმ ქართველი მოთამაშეების ვინაობას, რომლებიც საფრანგეთის მეორე ელიტური დივიზიონის მე-11 ტურის მატჩებში მიიღებენ მონაწილეობას.

ვანი (მე-15 ადგილი) – დაქსი (9)

ორივე გუნდის სასტარტო შემადგენლობაში თითო ქართველი მოთამაშე იასპარეზებს. მასპინძელთა მეორეხაზში ითამაშებს საქართველოს ნაკრებში დაბრუნებული ვახტანგ მაისურაძე, ხოლო სტუმართა რიგებში მარჯვენა ბურჯის პოზიციაზე ელიზბარ ყუფარაძე გაირჯება.

კარკასონი (16) – გრენობლი (1)

პრო დ2-ის აუტსაიდერთა რიგებში სამი ქართველი შალვა მამუკაშვილი, მირიან ბურდული და გიორგი ნაცარაშვილი ირიცხებიან, თუმცა მარქაფაში მხოლოდ ეს უკანასკნელია. გათამაშების ლიდერის შემადგენლობაში კი, მარჯვენა ბურჯის პოზიციაზე სასტარტოდან ითამაშებს ბექა გიგაშვილი.

მონ-დე-მარსანი (4) – ბეზიე (8)

კვლავ ტრავმირებულია მასპინძელთა მესამეხაზელი ბექა გორგაძე.

ორიაკი (13) – ნევერი (10)

მასპინძლები ცუდ ფორმაში არიან და უკანასკნელი ხუთი მატჩიდან მხოლოდ ერთში იმარჯვეს. ნიკოლოზ ხატიაშვილი და მერაბ შაქირაძე ძირითად შემადგენლობაში არიან და შეეცდებიან, რომ “ორიაკს” წარუმატებელი სერიის შეწყვეტაში დაეხმარონ.

ნარბონი (14) – მასი (7)

ეს შეხვედრა ქართველების გარეშე ჩაივლის. “ნარბონის” განაცხადში ვერ მოხვდა “ბორჯღალოსანი” მესამეხაზელი ბექა ბიწაძე, ხოლო სტუმართა რიგებში ბურჯი ილია კაიკაციშვილი არ ჩანს.

ბიარიცი (6) – კოლომიე (3)

“კოლომიეს” რიგებში ტრავმის გამო ვერ ითამაშებს გამოცდილი ქართველი ბურჯი ბექა შეყლაშვილი. ის წინა ტურში “მონტობანთან” გასამართი მატჩისთვის სასტარტო შემადგენლობაში მოხვდა, თუმცა თამაშის დაწყებამდე ტრავმა მიიღო და მოედანს გაურკვეველი ვადით ჩამოშორდა.

გეტყვით, რომ ტურის გახსნით შეხვედრაში “მონტობანმა” საკუთარ მოედანზე “ბაიონა” 25:20 დაამარცხა. ტურის დამასრულებელი რკენა კი კვირას გაიმართება: შალვა სუთიაშვილის და გიორგი ნეფარიძის “ანგულემი” მე-5 ადგილოსან “პერპინიანს” უმასპინძლებს.