ქუთაისის ‘აიამ’ სტატისტიკა არ გაიფუჭა და დიდი 10-ის წლევანდელ სეზონში ზედიზედ მეექვსე გამარჯვება მოიპოვა. ჩემპიონატის ლიდერი მე-6 ტურში ‘არმაზს’ თბილისში ეწვია, 30:10 სძლია და ერთადერთ გუნდად რჩება, რომელსაც თამაში არ წაუგია.

‘აია’ გიორგი ბაბუნაშვილის ჯარიმით დებიუტშივე დაწინაურდა. რეზი ჯინჭველაშვილს წონასწორობის აღდგენა 1 წუთში შეეძლო, მაგრამ მიზანმა უმტყუნა. ჯარიმა ბაბუნაშვილსაც გაუცუდდა, თუმცა მე-14 წუთზე ქუთაისელებმა უპირატესობა მაინც გაზარდეს: სწრაფი, ხელდახელ შეტევის შედეგად ფლანგზე სივრცეები გაჩნდა, გიორგი აბრამიძე მცველებს შორის გაძვრა და ბაბუნაშვილმა გარდასახა.

25-ე წუთზე ჯინჭველაშვილმა კარის წინ 18 მეტრიდან ჯარიმა გაიტანა, რაზეც სტუმრებმა 4 წუთში ლელოთი უპასუხეს: ჟორჟ სალდაძემ ხაზი გაგლიჯა და ცენტრიდან მეტოქის 22-ის სიღრმემდე ირბინა, იერიში მარჯვენა ფლანგზე გაიშალა და თემურ ირემაძის ლელოს კვლავ ზუსტი გარდასახვა მოყვა. ‘არმაზი’ ინივიატივას დაეუფლა, მეტოქე საკუთარ 22-ში გამოკეტა, გუგა ხანთაძის სინბინის შემდეგ რიცხობრივი უპირატესობა მოიპოვა, თუმცა ჯარიმების კარში დარტყმა იუარა, ‘აიას’ დაცვა ვერ გაარღვია და უქულოდ დარჩა - 3:17 პირველი ტაიმის შემდეგ.

ჯარიმის დარტყმა ქუთაისელებმა არ ითაკილეს და მეორე ტაიმის დებიუტში უპირატესობა გაზარდეს. ‘არმაზმა’ ლელოთი 48-ე წუთზე უპასუხა, დერეფნიდან შეტევის შემდეგ ხაზი გაიჭრა, რაქიდან ლუკა დვალიშვილმა შეუტია და ხაზზე შეაჩერეს, იქ ბექა გუგეშაშვილმა იყოჩაღა და ბურთი ლელოში გადაიტანა, ხოლო ჯინჭველაშვილმა ჩამორჩენა 10 ქულამდე დაიყვანა.

2 წუთში ბაბუნაშვილმა ჯარიმა გაიტანა, ‘არმაზმა’ 3 ქულაზე კვლავ უარი თქვა და ისევ შეცდა. ქუთაისელებმა 5-მეტრიანი წყვეტილიდან მეტოქე 22-ის გარეთ გაიყვანეს, მერე თავად გადავიდნენ შეტევაზე და შოთა არეშიძემ მასპინძლები მესამედ დაალელოვა, ხოლო ბაბუნაშვილმა გარდასახა და ‘აიამ’ 30:10 იმარჯვა.

ამრიგად, დიდი 10-ის მე-6 ტურში, შაბათ-კვირას გამართული ოთხივე მატჩი სტუმართა გამარჯვებით დასრულდა. ახლა გუნდებს 2-კვირიანი შესვენება აქვთ, რომლის დროსაც ‘ბათუმს’ ევროთასების ორი შეხვედრა ელის - იტალიაში ‘როვიგოსთან’ და ბათუმში ‘ჰაიდელბერგთან’.

საქართველოს რაგბის კავშირის პრესსამსახური