ახალი ზელანდიის ნაკრების გარემარბი ნეჰე მილნერ-სკადერი მძიმედ დაშავდა. 26 წლის გარემარბი 4 ერის ბოლო ტურში სამხრეთ აფრიკასთან მოგებული (25:24) შეხვედრის პირველ ტაიმში დაშავდა და თამაში ვეღარ განაგრძო.

როგორც გაირკვა, “ჰარიკეინსის” მოთამაშეს მხრის სერიოზული ტრავმა აქვს, საოპერაციოა და სარეაბილიტაციო კურსი დაახლოებით ექვს თვეს გასტანს.

აღსანიშნავია, რომ მილნერ-სკადერს მხრის ტრავმა აქამდეც აწუხებდა და ამის გამო დაახლოებით წელიწადნახევარი გამოტოვა. ნოემბრის ტესტებში მის ადგილს სავარაუდოდ ვაისაკე ნაჰოლო დაიკავებს, რომელსაც რაგბი ჩემპიონშიპში მხოლოდ ერთი თამაშის ჩატარება მოუწია.

შეგახსენებთ, რომ მილნერ-სკადერი “ოლ ბლექსს” 4 ერის მესამე ტურის მატჩში ტრავმირებული იზრაელ დაგის ნაცვლად დაუბრუნდა და სამ ჩატარებულ შეხვედრაში სამი ლელოს გატანა მოახერხა. სულ კი, “შავების” მაისურით 11-ჯერ აქვს ნათამაშები და მეტოქეები ამდენჯერვე ჰყავს დალელოვებული.