საფრანგეთის ტოპ 14-ის მე-4 ტურის ცენტრალურ მატჩში ერთმანეთს „მონპელიე“ და „ტულონი“ შეხვდნენ - მამუკა გორგოძის ყოფილი და ახლანდელი კლუბები. მონპელიელებმა მშობლიურ „ალტრადზე“ ერთობ სოლიდური სხვაობით იმარჯვეს - 43:20, მაგრამ როგორც ჩვენს გუშინწინდელ მიმოხილვაშიც ვახსენეთ, ამ მატჩის საკვანძო და გადამწყვეტი ეპიზოდი 63-ე წუთზე დაფიქსირდა. რეფერიმ მამუკა გორგოძე მაღალი ბოჭვისთვის გაასინბინა და იმ მომენტში მასპინძლები მინიმალური ანგარიშით იგებდნენ - 24:20, ქართველის მოსაკლისების შემდეგ კი ტულონელები გატყდნენ და წააგეს კიდეც.

ქართველი მეორეხაზელის გაძევებამ დიდი მითქმა-მოთქმა გამოიწვია. სპეციალისტთა ერთი ნაწილის აზრით, გორგოძე ყვითელ ბარათს არ იმსახურებდა. საქართველოს ნაკრების ექსკაპიტანმა მატჩის შემდეგ თავადაც ვერ დამალა გაკვირვება.

ფაქტია, რომ ტოპ 14-ის მსაჯები გორგოძეს ხშირად აჯარიმებენ მაღალი ბოჭვებისთვის (როგორც ეს „მონპელიესთან“ მატჩში მოხდა) და მხრებით ბოჭვისგან გათავისუფლებისთვის („კლერმონთან“ შეხვედრაში).

„რატომ ხდება ასე?“ - ჰკითხეს მამუკას ჟურნალისტებმა? ქართველმა ვარსკვლავმა უპასუხა, რომ მას არ აქვს ახსნა მის მიმართ მსაჯების ასეთი სიმკაცრისა. მისი თქმით, ახლო წარსულში ბაქის ბოთა გაცილებით ხისტად აკეთებდა იგივეს, რაშიც ახლა მას სდებენ ბრალს, და სამხრეთაფრიკელის დასჯა არავის მოსდიოდა აზრად.

„რასაც მე არ მპატიობენ, ბაქის ბოთა ათჯერ მეტს აკეთებდა და ვერ ვიხსენებ, ვინმეს ხმა ამოეღოს“, - დაიჩივლა გორგოძემ.