ქართული

15:50 | 11.09.2017 | ნანახია 1987 - ჯერ

ქართული ლეგიონი: “მონპელიე” დაუმარცხებელია

საფრანგეთის პირველ ელიტარულ დივიზიონ ტოპ 14-ში სამი ტური მიილია და ერთადერთი დაუმარცხებელი გუნდი ქართველების “მონპელიეა”.

ბონუს-ქულით ორი გამარჯვების შემდეგ, “მონპელიემ” მიმდინარე სეზონში სტუმრად პირველად ითამაშა და “კასტრს” 22:17 სძლია. სასიამოვნოა, რომ თამაშის მსვლელობისას სტუმართა ქომაგების ტრიბუნაზე საქართველოს დროშა იყო გამოფენილი, მოედანზე კი, ორი ბორჯღალოსანი გავიდა. მეორეხაზელმა კონსტანტინე მიქაუტაძემ პირველიდან 67-ე წუთამდე ითამაშა, ხოლო ბურჯი მიხეილ ნარიაშვილი ბრძოლაში 45-ე წუთზე ჩაერთო. სტუმრებმა დასკვნით 10 წუთში 10 უპასუხო ქულა აიღეს და გამარჯვებების სერია გააგრძელეს.

ახალი სეზონის სტარტზე მეორედ დამარცხდა ქვეყნის ჩემპიონი “კლერმონი”. “ვულკანებს” “ლა როშელმა” 51:20 მოუგო. სტუმართა შორის მიმდინარე სეზონში პირველად ითამაშა ოთარ გიორგაძემ. ის შეცვლაზე 47-ე წუთზე შევიდა. 47-ე წუთიდან ითამაშა ბურჯმა დავით ზირაქაშვილმაც. ამ დროს “კლერმონი” 6:48 აგებდა და შემდეგი ნახევარი საათი 14:3 მოიგო, თუმცა ამან საბოლოო შედეგზე გავლენა ვერ მოახდინა.

ბორდოში 10:30 დამარცხდა “სტად ფრანსე”. ზურაბ ჟვანია პარიზელთა სასტარტო შემადგენლობაში იყო და მოედანზე 51 წუთი გაატარა.

მეორე პარიზულმა კლუბმა “რასინგმა” “ბრივს” სტუმრად 25:6 აჯობა. მასპინძელთა შორის პირველიდან 54-ე წუთამდე ითამაშა კარლენ ასიეშვილმა, ხოლო 9 ნომერი ვასილ ლობჟანიძე შეცვლაზე 63-ე წუთზე შევიდა. “რასინგის” შემადგენლობაში 53-ე წუთიდან ითამაშა ვასილ კაკოვინმა.

სამმა ქართველმა ითამაშა “აჟენის” შემადგენლობაში, რომელიც “ოიონას” ეწვია და ბონუს-ქულას გამორჩა - 10:12. თამაზ მჭედლიძე ტრადიციულად, შეუცვლელად გაისარჯა, თამაშში 49-ე წუთიდან ჩაერთო ბურჯი გიორგი თეთრაშვილი, ხოლო კიდევ ერთი ბურჯი ვახტანგ ახობაძე მოედანზე 62-ე წუთზე გამოჩნდა.

“ტულონმა” “ტულუზას” დაძაბულ ბრძოლაში 20:16 აჯობა. თამაშში 56-ე წუთზე ჩაერთო მამუკა გორგოძე.

პრო დ2

საფრანგეთის მეორე ელიტარულ დივიზიონ პრო დ2-ში პირველი მარცხი იწვნია “გრენობლმა”. მე-4 ტურში ის “მონტობანს” ეწვია და ბოლო წუთზე გატანილი ლელო-გარდასახვით ბონუს-ქულას გამორჩა. სტუმრთა შორის დასკვნითი 20 წუთი ითამაშა ბექა გიგაშვილმა.

“ბიარიცს” უმასპინძლა და 26:22 სძლია “ანგულემმა”, რომლის რიგებშიც 54-ე წუთიდან ითამაშა შალვა სუთიაშვილმა. მოედანზე მისი გამოჩენისას ანგარიში 15:15 იყო, მალე სტუმრები დაწინაურდნენ, მაგრამ დასკვნით წუთებზე “ანგულემმა” იყოჩაღა.

ფრედ, 23:23 დასრულდა “ნარბონისა” და “კოლომიეს” შეხვედრა. მატჩში მონაწილეობა ორმა ქართველმა ლეგიონერმა მიიღო: მასპინძელთა შორის - ბექა ბიწაძემ (65-ე წუთიდან), სტუმართა შორის - ბექა შეყლაშვილმა (53-ე წუთიდან).

“მონ-დე-მარსანთან” სტუმრად 11:38 დამარცხდა ვახტანგ მაისურაძის “ვანი”. ქართველმა მეორეხაზელმა მეორე ტაიმში სრულად ითამაშა.

“ბეზიესთან” სტუმრად გამართული შეხვედრიდან ერთი ქულა წამოიღო “ორიაკმა” – 27:31. სტუმართა შორის სრულად ითამაშა ბორჯღალოსანთა კაპიტანმა მერაბ შარიქაძემ. სასტარტო შემადგენლობაში იყო და 43-ე წუთზე შეცვალეს ბურჯი ნიკოლოზ ხატიაშვილი.

“კარკასონი” “პერპინიანს” 50 წუთის შემდეგ 19:9 უგებდა, მაგრამ დარჩენილ დროში 20 უპასუხო ქულა გაუშვა და 19:29 დამარცხდა. მასპინძელთა სასტარტო შემადგენლობაში იყო და 69 წუთი ითამაშა კვაჭმა შალვა მამუკაშვილმა. 54-ეზე შეცვლაზე შევიდა მირიან ბურდული, მაგრამ მე-60 წუთზე ყვითელი ბარათით დაისაჯა და მოედანზე ჯამში 16 წუთი გაატარა.

საქართველოს რაგბის კავშირის პრესსამსახური


კომენტარები (1)

კომენტარის გამოქვეყნებისთვის, გთხოვთ გაიაროთ ავტორიზაცია ან რეგისტრაცია

FB ავტორიზაცია
19:01 | 12.09.2017
ogafa (251)

წარმატებები

0.06979