ცნობილი ავსტრალიელი მორაგბე, შერკინების ნახევარმცველი უილ გენია სამშობლოში დაბრუნდა. „სტად ფრანსეს“ ყოფილმა მოთამაშემ ავსტრალიის რაგბის კავშირთან ორწლიანი კონტრაქტი გააფორმა, თუმცა, მისმა არჩევანმა სპეციალისტები გააკვირვა - გენია „რებელსს“ შეუერთდა და არა „რედსს“, როგორც ეს ნავარაუდევი იყო.

„ერთი სული მაქვს, „მეამბოხეთა“ რიგებში როდის ვითამაშებ. ჩემი მთავარი ამოცანაა - დავეხმარო გუნდს და მის წარმატებებში წვლილი შევიტანო. ახალგაზრდებისთვის გამოცდილების გაზიარების ჩინებული შანსი გამიჩნდა და ამ შესაძლებლობას გამოვიყენებ კიდეც. დარწმუნებული ვარ, „რებელსი“ ბევრს მიაღწევს ახლო მომავალში“, - ასე ახსნა მელბურნში თავისი გადაბარგება 29 წლის ვარსკვლავმა.

უილ გენიამ ავსტრალიის ნაკრების კვართი 78 მატჩში მოირგო, მის ანგარიშზე 11 ლელოა.