„ოლ ბლექსის“ ცენტრი სონი ბილ უილიამსი მოედანს დაუბრუნდა და დისკვალიფიკაციის შემდეგ პირველი შეხვედრა ჩაატარა, თუმცა ჯერჯერობით უცნობია, ითამაშებს თუ არა ავსტრალიის ნაკრების წინააღმდეგ.

უილიამსმა „ბრიტანელ და ირლანდიელ ლომებთან“ მატჩისას ენტონი უოთსონზე სახიფათო ბოჭვა შეასრულა და ოთხმატჩიანი დისკვალიფიკაცია მიიღო. უკანახაზელმა სასჯელის ნახევარი მოიხადა და გეგმავდა, რომ ახალი ზელანდიის ჩემპიონატის ორი მატჩის გამოტოვებით დისკვალიფიკაციას სრულად მოიხდიდა.

მაგრამ „მსოფლიო რაგბმა“ ეს შეხვედრები არაოფიციალურად მიიჩნია და ჩათვალა, რომ სონი ბილს 19 და 26 აგვისტოს ავსტრალიის ნაკრების წინააღმდეგ არ უნდა ეთამაშა. აღნიშნულთან დაკავშირებით „მსოფლიო რაგბის“ სადისციპლინო კომიტეტმა გასულ კვირაში დამატებით იმსჯელა, მაგრამ 2 საათის განმავლობაში გადაწყვეტილება ვერ მიიღო.

სანამ უილიამსი პასუხს ელის, ახალი ზელანდიის ჩემპიონატი დაიწყო და მან „ქაუნთისის“ შემადგენლობაში 65 წუთი ითამაშა. ის იმედოვნებს, რომ საკითხი დადებითად გადაწყდება და ავსტრალიასთან მატჩს კარგ ფორმაში შეხვდება.

„ვცდილობდი, სრულად დავხარჯულიყავი. ინდივიდუალურად ვვარჯიშობდი და საუკეთესო ფორმაში შესვლა მინდოდა, რათა სათანადოდ ვითამაშო ავსტრალიის ნაკრების წინააღმდეგ“, - განაცხადა სონი ბილ უილიამსმა.