საქართველოს ნაკრების შუამარბმა გიორგი ფრუიძემ რუსეთის ჩემპიონატში დებიუტი დუბლით აღნიშნა. 23 წლის ბორჯღალოსანმა „კრასნი იართან“ კონტრაქტის გაფორმების შემდეგ პირველად ითამაშა ციმბირული გუნდის კვართით და „სლავას“ რბევას საფუძველი ჩაუყარა.

მოსკოვში გამართული ამ გუნდების შეხვედრის საწყისი მეოთხედი „სლავას“ კარნახით წარიმართა და სტუმრები კმაყოფილები უნდა ყოფილიყვნენ, რომ ტაბლოზე 0:0 ენთო. მაგრამ 22-ე წუთზე „კრასნი იარის“ პირველივე სახიფათო შეტევა ფრუიძემ ლელოთი დააგვირგვინა და ანგარიში გახსნა. ტაიმის მიწურულს კი მოსკოველთა დაცვამ ორი უხეში შეცდომა დაუშვა და კიდევ ორი ლელო მიიღო - 0:21 პირველი ტაიმის შემდეგ.

მეორე ნახევარში კრასნოიარსკელებმა კიდევ 4 ლელო დადეს, რომელთაგან მეორე კვლავ ქართველმა უკანახაზელმა მიითვალა. საბოლოოდ - 45:5 „კრასნი იარის“ სასარგებლოდ, რომელიც სატურნირო ცხრილში „ენისეისა“ და „ყუბანის“ შემდეგ მე-3 საფეხურზეა. ციმბირელთა შორის მეორე ნახევარში კიდევ ერთი ბორჯღალოსანი გამოჩნდა - ლაშა მალაღურაძე, რომელმაც თამაშის მიწურულს საჯარიმო დარტყმა ააცილა.