ტონგამ 2019 წლის მსოფლიო თასის შესარჩევი ციკლის წყნარი ოკეანის ჯგუფში მეორე ადგილი დაიკავა და იაპონიაში „გ“ ჯგუფში - ინგლისის, საფრანგეთის, არგენტინისა და აშშ-ის ნაკრებებთან ითამაშებს.

ორწრიანი ტურნირის დასკვნით მატჩში სამოა ფიჯის მასპინძლობდა და თუნდაც პრემიალური ქულა რომ აეღო, შესარჩევ ჯგუფში მეორე ადგილს თავად დაიკავებდა. მასპინძლებმა პირველი ტაიმი 16:14 მოიგეს, თუმცა შესვენების შემდეგ სამი უპასუხო ლელო მიიღეს და 16:38 დამარცხდნენ. შედეგად, ფიჯიმ 2017 წლის წყნარი ოკეანის თასი მოიგო და სამოა ორწრიან შესარჩევში ბოლო, მესამე ადგილზე დატოვა.

სამოელები იაპონიის საგზურისთვის გაისად, ევროპის შესარჩევ ზონაში მეორე ადგილზე გასულ გუნდს შეხვდებიან.