საქართველოს 20-წლამდელთა ნაკრების მორაგბე გელა აფრასიძე ოფიციალურად “მონპელიეს” მოთამაშეა. ამის შესახებ ფრანგული კლუბის ვებგვერდი იტყობინება. 19 წლის 9 ნომერმა ტოპ 14-ის კლუბთან 3-წლიანი კონტრაქტი გააფორმა.

აფრასიძე აქამდე “ლელო სარასენსის” რიგებში გამოდიოდა და 2016 წელს საქართველოს ჩემპიონიც გახდა. ცოტა ხნის წინ დასრულებულ მსოფლიოს 20-წლამდელთა ჩემპიონატზე კი დიდებულად ითამაშა.

დებიუტი უკვე ბორჯღალოსნების შემადგენლობაშიც ჰქონდა და ეროვნული ნაკრების მაისური 2-ჯერ მოირგო.

რაც შეეხება “მონპელიეს”, ამ კლუბმა ტოპ 14-ში ყველაზე დიდ წარმატებას 2011 წელს მიაღწია, როდესაც მეორე ადგილი დაიკავა. აფრასიძის გარდა ამ გუნდში კიდევ ხუთი ქართველი ირიცხება: მიხეილ ნარიაშვილი, დავით ქუბრიაშვილი, კოტე მიქაუტაძე, უშანგი ჭეიშვილი და გიორგი გოგოლაძე. 2005-2014 წლებში კი, “მონპელიეში” მამუკა გორგოძე თამაშობდა.