წუხელ ბორჯღალოსნებმა არგენტინულ ქალაქ ხუხუიში მასპინძელთა ნაკრებთან 29:45 წააგეს. ჩვენმა ნაკრებმა 4 ლელო გაიტანა, „პუმებმა“ – 5, რომელთაგან 3 არგენტინელთა გარემარბ რამირო მოიანოს ანგარიშზეა.

27 წლის ფეხმარდმა მორაგბემ თამაში მართლაც უმაღლეს დონეზე ჩაატარა და ჰეთ-თრიკი ალალად დაიმსახურა, თუმცა, მატჩისშემდგომ კომენტარში მოიანო თავმდაბლობს და აქცენტი გუნდურ წარმატებაზე გადააქვს:

„ძალიან გახარებულები ვართ, რომ გუნდმა კარგად ითამაშა, გავიმარჯვეთ და ძალიან პოზიტიური მუხტი მივიღეთ - ვიზრდებით, როგორც გუნდი.

მართლაც კარგად ვითამაშეთ და დღეს უკეთესი გუნდი არგენტინა იყო. ეჭვგარეშეა, რომ ამ თამაშში გამარჯვება დავიმსახურეთ. ყველაფერი სწორად გავაკეთეთ და შედეგიც მივიღეთ. დიდი სიხარულია, რომ სამი ლელო გავიტანე, მაგრამ ეს არა ჩემი პირადი სიხარულია, არამედ სიხარული მთელი გუნდისა, რომელმაც ბურთი შეტევაში ისე ათამაშა, რომ იერიშების დასრულებაღა მრჩებოდა.

მთელი კვირა თავდაუზოგავად ვიმუშავეთ, თამაშისთვის კარგად მოვემზადეთ. გარკვეული შეცდომები კი გვქონდა, მაგრამ პირველი ნახევარი ფაქტობრივად უნაკლოდ ჩავატარეთ. მეორეში თამაში გაიხსნა, დინამიკამ მოიმატა, მაგრამ ჩვენ კარგად ვიშრომეთ და სადავეები ხელიდან არ გავუშვით.

ეს დადებითი შედეგია, რომელიც გვმატებს რწმენას და სურვილს, რომ წინსვლა გავაგრძელოთ. დღევანდელი გამარჯვება იყო ჩვენს მიერ გაწეული შრომის წახალისება. ვიცით, რომ სწორ გზაზე ვართ.

უნდა შეგვეტია და თავიც უნდა დაგვეცვა, მიუხედავად სათამაშო პირობებისა. უნდა გვეთამაშა რაც შეგვეძლო, მიუხედავად ხუხუის სიმაღლისა და აქაური კლიმატისა...“

ბოლოს იმასღა დავძენთ, რომ ხუხუი სუბტროპიკული ქალაქია და ანდებში ერთობ მაღლა მდებარეობს - ზღვის დონიდან 1260 მეტრზე.