საქართველოს 20-წლამდელთა ნაკრების მთავარი მწვრთნელი ილია მაისურაძე და კაპიტანი ილია სპანდერაშვილი ირლანდიასთან IX ადგილისთვის წაგებული (18:24) მატჩის შემდეგ პრესკონფერენციაზე გამოცხადდნენ და აღნიშნულ შეხვედრაზე ისაუბრეს.

ილია მაისურაძე: “მეორე ტაიმის დასაწყისში ძალიან გაგვიჭირდა. მეტოქემ ამ პერიოდში ძალიან მოუმატა. ბურთი დაიჭერა და რაქში სწრაფად ათამაშდა, რაზეც აყოლა თვიდან გაგვიჭირდა. თუმცა, შემდეგ გადაწყობა შევძელით და თამაშის გათანაბრება მოვახერხეთ.

თავისუფლად შეიძლებოდა მოგება. მობილიზება დაგვაკლდა. ვფიქრობ, მეტი კონცენტრაცია რომ ყოფილიყო და ჩვენი ძლიერი მხრეები გამოგვევლინა, ამ მატჩს მოვიგებდით. თუმცა, მეხუთე მატჩი გახლდათ, ბიჭები დაღლილები იყვნენ და რთულია ყველა მომენტში ზედმიწევნით ყურადღებით თამაში. პირველ ტაიმში თავს კარგად ვიცავდით, შერკინებაში დიდი უპირატესობა გვქონდა, თუმცა ირლანდიელები სხვა კომპონენტებში თამაშობდნენ კარგად, ხოლო შერკინებაში მსაჯმა რამდენიმე საკამათო გადაწყვეტილება მიიღო ჩვენს საწინააღმდეგოდ და აქეთ დაგვაჯარიმა.

ჩვენთვის ამ ტურნირში მეორე წელი იყო. მინდა ყველას მადლობა გადავუხადო. ბიჭებიდან ზოგიერთი უკვე დიდ რაგბში მიდის და მინდა წარმატება ვუსურვო მათ. ჩვენი მთავარი მიზანი ელიტაში დარჩენა იყო, რაც წარმატებით მოვახერხეთ. ყველა მატჩში ბევრი მიზეზის გამო 100%-ით ვერ ვითამაშებდით, რადგან სათადარიგოთა სკამი გრძელი არ გვაქვს და ძალების სწორად ლავირება უნდა მოგვეხდინა. ჩვენ საკუთარი მიზანი გვქონდა დასახული და ამის გაკეთება წარმატებით მოვახერხეთ. თუ ნაკრებში ჩვენი სამწვრთნელო შტაბი დარჩება, აღებულ კურსს შევინარჩუნებთ და მომავალი თაობის კონტიგენტის მიხედვით დავსახავთ გეგმებს”

ილია სპანდერაშვილი: “პირველ რიგში ვიტყვი, რომ ეს წელი ჩემთვის ბოლო იყო 20-წლამდელთა ნაკრებში და მინდა ყველას მადლობა გადავუხადო: მწვრთნელებს, ექიმებს, გუნდელებს და ა.შ. ამ გუნდში მე ძალიან ბევრი ვისწავლე.

რაც შეეხება ამ მატჩს, ვფიქრობ, რომ ჩვენი შეცდომებით წავაგეთ. ირლანდია კარგი გუნდია, მაგრამ არა ჩვენზე მაგარი. მსაჯს რაც შეეხება, როდესაც საკითხი 50-50-ზეა , მსაჯი ყოველთვის უფრო სახელოვანი გუნდისკენ იხრება, ეს ყოველთვის ასეა. იყო მომენტები, როდესაც მსაჯს შეეძლო ჯარიმა ჩვენს სასარგებლოდ დაედო, თუმცა პირიქით მოიქცა და ამ გადაწყვეტილებებმა შედეგზე გავლენა მოახდინა”