უმცროსმა ბორჯღალოსნებმა მსოფლიო რაგბის 20-წლამდელთა ჩემპიონატის მეორე მატჩში სამხრეთ აფრიკასაც ორი ლელო დაუდეს, თუმცა ეს საკმარისი არ აღმოჩნდა და ‘ნორჩმა ქურციკებმა’ 38:14 იმარჯვეს.

ბიჭებს მონდომება არც ამჯერად აკლდათ და მოწინააღმდეგესთან 15-20 წუთი უპირატესობას ფლობდნენ, მაგრამ მეტოქის მაღალი სათამაშო კლასი აქაც გადამწყვეტი აღმოჩნდა. უმცროსმა ბორჯღალოსნებმა ყველა ქულის მოპოვებას უდიდესი ენერგია შეალიეს, უფრო მეტი გამოუყენებელ მომენტებში დახარჯეს, აფრიკელებმა კი, ჩვენი შეცდომებით ისარგებლეს და პირველი ტაიმის მიწურულს გადამწყვეტი უპირატესობა მოიპოვეს.

"ქურციკები" თბილისში ერთ-ერთი ფავორიტის რანგში ჩამოვიდნენ, მაგრამ პირველ ტურში საფრანგეთთან მხოლოდ ფრეს დასჯერდნენ და ქართველებს დიდი მონდომებით ეკვეთნენ. პირველი ტაიმის 35-მა წუთმა თანაბარ ბრძოლაში ჩაიარა და მეტოქის ნახევარზე დიდი დრო გავატარეთ, თუმცა მრავალი შესაძლებლობიდან მხოლოდ ერთი გამოვიყენეთ.

თამაში კვირას, დასვენების დღეს გაიმართა, მაყურებელი "ავჭალაზე" მრავლად მივიდა და 18 საათისთვის ტრიბუნები პირთამდე შეივსო. გულშემატკივრების დიდმა ჯგუფმა თავი ღობესთან მოიყარა და ჯამში 4-ათასამდე ქომაგი უმცროს ბორჯღალოსნებს მთელი 80 წუთი ამხნევებდა.

მატჩის დებიუტში მეტოქეებმა თითო ჯარიმა ააცილეს. მერე აფრიკელებმა ტემპს უმატეს და მაგრად შემოგვიტიეს. გარკვეული დროით მათი მიძალების შეჩერება შევძელით, მაგრამ მე-17 წუთზე აუგუსტუსმა მრავალფაზიანი იერიში ლელოთი დაასრულა და სილიერმა გარდასახვით მონაგარს კიდევ 2 ქულა შემატა.

ამის შემდეგ იყო დაახლოებით 15 წუთი, რომლის დროსაც უმცროსი ბორჯღალოსნები დომინირებდნენ. მეტოქის ლელოს ხაზი ორჯერ გადაიკვეთა და პირველად ეს გუნდის კაპიტანმა ილია სპანდერაშვილმა მოახერხა, რომელიც ლელოში შეიჭრა და მიწაზე ბურთიანად დაეშვა. თავიდან რეფმა ლელო ჩასტვინა, მერე ვიდეო-რეფერი მოითხოვა და დიდი ხნის მსჯელობის შემდეგ ლელო გაგვიუქმა - საკამათო ეპიზოდი მსაჯმა სტუმართა სასარგებლოდ განსაჯა და ჩათვალა, რომ სპანდერაშვილს ბურთი დამიწებამდე დაუვარდა.

ვინაიდან მანამდე ხეირზე ვთამაშობდით ჯარიმა დაგვიბრუნდა, იოლი 3 ქულის აღებაზე უარი ვთქვით და ლელოზე ვითამაშეთ, მაგრამ უშედეგოდ. 30-ე წუთზე კუთვნილი ლელო მაინც დავდეთ: კვესელაძის ოფლოუდის შემდეგ, დავით მესხი მბოჭავს ფლანგზე გაექცა და სიჩქარე აკრიფა, ბურთი თედო აბჟანდაძესთან გაითამაშა და იერიში გელა აფრასიძეს გააგრძელებინა, რომელსაც მიზნამდე სულ ცოტა დააკლდა, სპანდერაშვილმა ბურთი კიდევ უფრო წინ წაწია, რაქიდან ლაშა ტაბიძემ და უჩა ჭეიშვილმა ერთად დაარტყეს და დამსახურებული ლელო აფრასიძემ გარდასახა - 7:7.

"ავჭალაზე" მისული გულშემატკივარი გაგრძელების მოლოდინში ახმაურდა და მეტოქის ნახევარზე კარგი შესატევი პლატსდარმი მივიღეთ, თუმცა დერეფანში ბურთი დაიკარგა, ფეხით გადმოკიდებულიც ვერ ავიღეთ და სიმელანემ ლელოთი დაგვამწუხრა. ორიოდე წუთში კიდევ ერთხელ შევცდით, ფეხით გადაკიდებული ბურთი მეტოქის ნადავლი გახდა, სამჯერ ფეხით თამაშის შემდეგ ჩვენს ლელოში აღმოჩნდა და ლიბოკმა დაამიწა. ორიდან ერთი გარდასახვა ზუსტი იყო და 7:19 ჩამოვრჩით.

შესვენების შემდეგ პირველი შეტევა ჩვენი იყო, მაგრამ უქულოდ დასრულდა. მერე რეფერიმ რამდენჯერმე შერკინებაში დაგვაჯარიმა და ბოლოს შეცვლაზე შესული გურამ გოგიჩაშვილი გაასინბინა. აფრიკამ მეტობა 12 ქულად აქცია. მეოთხე ლელო პენქსემ 54-ე წუთზე მიითვალა, ორ წუთში კი ‘ქურციკებმა’ ხელდახელ კონტრშეტევა წამოიწყეს და სიმელანემ დუბლი შეასრულა.

65-ე წუთზე სტუმრებს მეორე ლელოთი ვუპასუხეთ. მოლიდან ბურთი ხაზზე გამოვიდა, აბჟანდაძემ ის ძელებსშუა ფეხით შეაცურა და გიორგი გოგოლაძე კარგად მიყვა. ლიბოკმა ლელოთი მალევე გვიპასუხა, ხოლო დასკვნითმა წუთებმა ქართველთა იერიშებში ჩაიარა. მესამე ლელოს დადებაც შეიძლებოდა, მაგრამ ეს არ გამოვიდა. უკანასკნელ წუთებზე რეფერიმ ერთი აფრიკელი ყვითლით, ხოლო მეორე წითელი ბარათით გააძევა. სინბინში გაუშვა თორნიკე ჯალაღონიაც და მალე შეხვედრაც დასრულდა - 38:14 აფრიკელთა სასარგებლოდ.

ჯგუფური ეტაპის დასკვნით მატჩში 8 ივნისს საფრანგეთს "ავჭალაზე", 18 საათზე ვეთამაშებით.

პრესკონფერენცია

ჩინ რუ (სამხრეთ აფრიკის მთავარი მწვრთნელი): „ვიცოდით, რომ ადგილობრივი გულშემატკივრის წინაშე რთული თამაში გველოდა, თუმცა ჩვენმა ბიჭებმა წნეხს კარგად გაუძლეს. ეს იყო შესანიშნავი ბრძოლა და ვამაყობ მიღწეული შედეგით. ველოდით, რომ საქართველო ბურთის შენელებას ეცდებოდა და აქცენტს შერკინებასა და მოლზე გადაიტანდა. გავიმარჯვეთ და ვიწყებთ მზადებას მომდევნო შეხვედრისთვის“.

ილია მაისურაძე (საქართველოს მთავარი მწვრთნელი): „ვიცოდით, რომ სამხრეთ აფრიკელებთან ფიზიკურად მძიმე თამაში გველოდა. ეს მათი სტილია და მეტოქის მორაგბეები ჩვენსაზე გაცილებით დიდები იყვნენ. გარდა ამისა, ისინი სამშობლოში მაღალი დონის ჩემპიონატში მონაწილეობენ და მეტი გამოცდილება აქვთ. ვიცოდით მეტოქე ძალისმიერ თამაშს რომ შემოგვთავაზებდა და ამის შემდეგ ფლანგებზე ეცდებოდა უპირატესობის გამოყენებას. პირველ ნახევარ საათში ამას გავუმკლავდით, მაგრამ 4-5 წუთით მოვდუნდით და ამისათვის დავისაჯეთ. ახლა განვლილი ორი თამაში უნდა გავაანალიზოთ და საჭირო დასკვნები გამოვიტანოთ“.

მსოფლიო რაგბის 20-წლამდელთა ჩემპიონატი

თბილისი. ავჭალა. 4000 მაყურებელი

საქართველო – სამხრეთი აფრიკა 14:38 (7:19)

საქართველო: 15. მირიან მოდებაძე, 14. აკაკი ტაბუცაძე, 13. ბეჟან გავაშელიშვილი (22. გიორგი წიკლაური 44), 12. გიორგი კვესელაძე, 11. დავით მესხი (23. გიორგი გოგოლაძე 58), 10. თედო აბჟანდაძე, 9. გელა აფრასიძე (21. ლუკა დვალიშვილი 70); 1. უშანგი ჭეიშვილი (17. გურამ გოგიჩაშვილი 47), 2. ლევან პაპიძე (16. თენგიზ ზამთარაძე 47), 3. ლაშა ტაბიძე (18. რევაზ დუგლაძე 61), 4. კობა ჯიმშელეიშვილი (19. ბექა საღინაძე 59), 5. ლაშა ჯაიანი, 6. თორნიკე ჯალაღონია, 7. ილია სპანდერაშვილი (კაპ.) (20. ალექსანდრე კალმახელიძე 67), 8. შოთა არეშიძე (ჭეიშვილი 53-59).

2 ლელო: ჭეიშვილი, გოგოლაძე

2 გარდასახვა: აფრასიძე

2 სინბინი: გოგიჩაშვილი, ჯალაღონია

საქართველოს რაგბის კავშირის პრესსამსახური