ოთხშაბათს, 10 მაისს, საქართველოს დროით 12 საათზე, კიოტოში (იაპონია) 2019 წლის მსოფლიო თასის ჯგუფური ეტაპის წილისყრა გაიმართება და ბორჯღალოსნები მეტოქეები ვინაობას შეიტყობენ.

პირველად ქართული რაგბის ისტორიაში, ბორჯღალოსნები წილისყრას განთესილი ნაკრების სტატუსით ხვდებიან. მილთონ ჰეიგის გუნდმა 2015 წლის მსოფლიო თასზე ტონგასა და ნამიბიის ძლევით ჯგუფში მესამე ადგილი დაიკავა, 12 მოწინავეს შორის მოხვდნენ და მომავალი მსოფლიო თასის საგზური დაიბევეს.

2017 წლის ექვსი ერის დასრულების შემდეგ, მსოფლიო რაგბის რეიტინგში დაკავებული ადგილების მიხედვით 2019 წლის მსოფლიო თასის 12 მონაწილე კალათებში განაწილდნენ. ბორჯღალოსნები მესამე კალათაში არგენტინის, იაპონიისა და იტალიის ნაკრებებთან მოხვდნენ, რაც იმის მანიშნებელია, რომ ჯგუფურ ეტაპზე ისინი ჩვენი მეტოქეები არ იქნებიან.

ორი მეტოქე ხვალვე გახდება ცნობილი: პირველი კალათიდან ეს იქნება ახალი ზელანდია, ინგლისი, ავსტრალია, ან ირლანდია; მეორე კალათიდან შოტლანდია, საფრანგეთი, სამხრეთ აფრიკა, ან უელსი.

გაირკვევა ორი სავარაუდო მეტოქეც, მაგრამ რადგან რეგიონალური შესარჩევი ტურნირები ჯერ არ დასრულებულა, კონკრეტულ გუნდებს მოგვიანებით შევიტყობთ.

მეოთხე კალათაში არიან: ზღვისრეთი 1, ამერიკა 1, ევროპა 1 და აფრიკა 1;

მეხუთე კალათაში: ზღვისრეთი 2, ამერიკა 2, პლეი ოფის გამარჯვებული (ევროპა 2 - ზღვისრეთი 3) და რეპეშაჟის გამარჯვებული.

ზღვისრეთის ("ოკეანეთი") შესარჩევი ტურნირი ამა წლის ივნისში სრულდება და ორი საუკეთესო გუნდი მსოფლიო თასის საგზურს მიიღებს (ფიჯი, სამოა და ტონგა), ხოლო მესამე ევროპის შესარჩევი ჯგუფის მეორეადგილოსანთან პლეი ოფს ითამაშებს (დაახლოებით 1 წლის შემდეგ);

ამა წლის ივნისში გაირკვევა ამერიკა 1-ც (შტატები ან კანადა), დამარცხებული მეორე საგზურისთვის სამხრეთ ამერიკის შესარჩევი ჯგუფის გამარჯვებულს პლეი ოფში შეხვდება;

გაისად მარტში გახდება ცნობილი ევროპის შესარჩევი ჯგუფის გამარჯვებული, ასევე მეორეადგილოსანი, რომელიც წყნარი ოკეანის მესამე გუნდს პლეი ოფში შეერკინება (რუმინეთი, ესპანეთი, რუსეთი და გერმანია);

დანარჩენი ორი საგზური აფრიკის შესარჩევი ტურნირის და საკონტინენტთაშორისო რეპეშაჟის გამარჯვებულ გუნდებს ერგება.

კიოტოში გაემგზავრნენ და წილისყრას ესწრებიან ბორჯღალოსნების მთავარი მწვრთნელი მილთონ ჰეიგი და მენეჯერი ირაკლი ხუნდაძე.

საქართველოს რაგბის კავშირის პრესსამსახური