გორის "ჯიქმა" პლეი-ოფის შესარჩევ ფინალში "ბათუმი" 25:6 დაამარცხა და პირველად კლუბის არსებობის ისტორიაში დიდი 10-ის ფინალში ითამაშებს.

ზღვისპირელები დისციპლინამ დააღალატა. ისინი ორჯერ დარჩნენ კაცნაკლული და ორივე ჯერზე ლელო მიიღეს. "ჯიქმა" საკუთარი შესაძლებლობები მეტოქეზე უკეთ გამოიყენა და სეზონის გადამწყვეტ მატჩში თამაშის უფლება დაიბევა.

შეხვედრა ძლიერი ქარის ფონზე, ორმხრივი შეცდომებით წარიმართა. მატჩის დებიუტში გორის "ჯიქის" შერკინებამ "ბათუმისა" დაჯაბნა და რამაზ ხარაზიშვილმა კარის წინ 35 მეტრიდან ანგარიში გახსნა.

საწყისი 10 წუთის შემდეგ ინიციატივას ზღვისპირელები დაეუფლნენ და მე-13 წუთზე თემურ სოხაძემ 30-32 მეტრიდან გატანილი არეკნით წონასწორობა აღადგინა. სტუმრებს ფეხით თამაშში უპირატესობა ჰქონდათ, მაგრამ საკუთარი დერეფნების უმეტესობა წააგეს და შანსები გაანიავეს, ხოლო შერკინებაში ვერცერთმა გუნდმა ვერ მოახერხა უპირატესობის მოპოვება და ირლანდიელ რეფერის ეს ნამდვილ თავსატეხად ექცა.

ტაიმის შუაში სოხაძეს ჯარიმა და არეკნი გაუცუდდა, ხოლო 30-ე წუთიდან "ჯიქმა" მეტოქის ნახევარზე გადასვლა მოახერხა და "ბათუმის" 22-ში დამკვიდრდა. სტუმრები ჯარიმის ხარჯზე ახერხებდნენ სალელოვე მიძალებების შეჩერებას და ჯონდი კორტავა სინბინით დაისაჯა. გორელებმა მესამე ცდაზე შეძლეს წარმატებული მოლის დაყენება და ლელო ბექა მამრიკიშვილმა დაამიწა. გარდასახვა არაზუსტი იყო, ტაიმის ბოლოს სოხაძემ ჯარიმა გაიტანა და სხვაობა 2 ქულამდე შეამცირა - 8:6.

მეორე ტაიმში ქარი გორელების სასარგებლოდ ქროდა. დებიუტში სოხაძეს ჯარიმა გაუცუდდა, რამაზ ხარაზიშვილმა შორიდან გაიტანა (11:6). მალე რეფერიმ ორივე გუნდის პირველხაზელი გაასინბინა, შერკინებიდან ბურთი პირველად გავიდა და "ჯიქის" მწვავე შეტევის მოგერიებას ბათუმელთა კიდევ ერთი მორაგბე შეეწირა (სინბინი). სტუმრებმა თითქოს შეძლეს სიტუაციის განმუხტვა, მოლით საკუთარი 22-იდან ცდილობდნენ გასვლას, მაგრამ მოულოდნელად ბურთი დაკარგეს და ის ლელოში გოგა კაკოვინმა დაამიწა, ხოლო ხარაზიშვილმა რთული პოზიციიდან გარდასახა - 18:6.

"ბათუმმა" სიტუაციის გამოსწორება სცადა, თუმცა მათი შეტევები ქაოტური იყო, გადაცემები არაზუსტი და კონტრშეტევა მიიღეს. გორელებმა სამჯერ ითამაშეს ფეხით, მესამედ ნიკა ბიწაძემ, რომელიც უბურთოდ შებოჭეს და რეფერიმ საჯარიმო ლელო ჩასტვინა, ხოლო ხარაზიშვილმა გარდასახვით საბოლოო შედეგი დააფიქსირა.

"ჯიქი" ფინალშია და თასისთვის 14 მაისს იბრძოლებს, ხოლო "ბათუმს" ფინალში გასვლის შანსი 7 მაისს ექნება, როდესაც "აკადემიასა" და "ლელო-სარასენსს" შორის გამარჯვებულს მცირე ფინალში შეხვდება. "აკადემიისა" და "ლელო-სარასენსის" შეხვედრა ხვალ, 15 საათზე "რუსთავი არენაზე" გაიმართება.

საქართველოს რაგბის კავშირის პრესსამსახური