რაგბი ევროპის ჩემპიონთა თასის მეოთხედფინალში, „ტულონთან“ მოგებული მატჩის მსვლელობისას „კლერმონის“ ბურჯმა დავით ზირაქაშვილმა ტრავმა მიიღო. ეს 2 აპრილს მოხდა და მას შემდეგ ქართველმა მორკინალმა ტოპ 14-ში „ბრივთან“ და „გრენობლთან“ შეხვედრები გააცდინა.

როგორც ფრანგულ პრესაში დაიწერა, ზირაქაშვილს ჯერაც არ მოშუშებია მტკივანი ტერფი და „ვულკანების“ დამრიგებელი ფრანკ აზემა შიშობს, რომ გუნდის ერთ-ერთი ლიდერი კვირას „ლენსტერთან“ ჩემპიონთა თასის ნახევარფინალშიც დააკლდება. საკლუბო საიტის შეფასებით, ზირაქას თამაშის ალბათობა 60%-ს შეადგენსო.

ასევე დაშავებულია კოტე მიქაუტაძეც. „მონპელიეს“ მეორეხაზელმა გასულ კვირას, „ბაიონთან“ 61:22 მოგებული მატჩის მიწურულს ლავიწი დაიშავა და თამაში ვეღარ გააგრძელა. მიქაუტაძეს დღეს ჩაუტარებენ ტესტირებას, რომელიც დაზიანების ხარისხს დაადგენს და ექიმებს მხოლოდ ამის მერე ეცოდინებათ, შეძლებს თუ არა კოტე კვირას „რასინგის“ წინააღმდეგ თამაშს.