უმცროსმა ბორჯღალოსნებმა (18-წლამდელები) 2017 წლის რაგბი ევროპის ღია ჩემპიონატის ნახევარფინალში მებრძოლი იაპონია 42:17 დაამარცხეს და ტურნირის ფინალში ზედიზედ მესამედ ითამაშებენ.

შეხვედრას გულშემატკივარი მრავლად დაესწრო და ნეიტრალური ქომაგის გარდა, ტრიბუნებზე ბევრი იაპონელის ხმას “საქართველო - საქართველოს” ხმა ფარავდა.. თამაშმა ქარის ფონზე, სასიამოვნო ატმოსფეროში და დაძაბულ ბრძოლაში ჩაიარა. აზიელები წარმატების შანსს 55-ე წუთამდე ინარჩუნებდნენ (ამ ასაკში თამაში 70 წუთს გრძელდება), მაგრამ დასკვნით წუთებში უცროსმა ბორჯღალოსნებმა მეტოქე საბოლოოდ გატახეს და მატჩი სასურველ შედეგამდე მშვიდად მიიყვანეს.

ისე, როგორც კანადასთან, ქართველმა შეხვედრა აგრესიულად დაიწყეს და ანგარიში პირველსავე წუთზე გახსნეს. მათ რაქიდან იერიში მარცხენა ფრთაზე გაშალეს, ხაზი გაჭრეს და ლელოში ოთარ ძაგნიძე შევიდა. თედო აბჟანდაძემ ქარში გარდასახვა გააცუდა და მე-7 წუთზე ბურთი სადგამიდან ორჯერ გადავარდა, მაგრამ სისწრაფეში შორეული ჯარიმა კარგად შეასრულა და ანგარიში 8:0 გახადა.

იაპონელები გააქტიურდნენ და მაგრად შემოგვიტიეს. ისინი სწრაფად ასუფთავებდნენ რაქებს და შლიდნენ შეტევებს, კარგად კენძდნენ ფაზებს და წინ მიიწევდნენ, მაგრამ ბორჯღალოსნები ძლიერად დადგნენ და მეტოქე 22-ში არ შეუშვეს. მე-18 წუთზე რეფმა ძაგნიძე მაღალი ბოჭვისთვის გაასინბინა და რადგან ლელო ვერ გაჰქონდათ, თანაც სხვაობაც მცირე იყო, იაპონელებმა ჯარიმიდან 3 ქულა აიღეს.

მიუხედავად იმისა, რომ მოედანზე კაცნაკლული ვიყავით, თამაშის გათანაბრება მოვახერხეთ და აბჟანდაძემ ჯარიმის გატანა 55 მეტრიდან სცადა, მიზანმა ოდნავ უმტყუნა. სამაგიეროდ მალე ლელო დავდეთ, მეტოქის 22-ში მოგებულ დერეფანს მოლი მოყვა, მისი ჩაქცევის შემდეგ წინ ახლო დარტყმებით ვიარეთ, შეტევის დაგვირგვინება თავის თავზე გიგი ლეშკაშელმა აიღო და ლელო დადო, ხოლო აბჟანდაძემ გარდასახა. ტაიმის მიწურულს იმავე სტილში კიდევ ერთი ლელოს დადება შეიძლებოდა, მაგრამ ბოლო მომენტში დავჯარიმდით - 15:3.

პირველსავე ტაიმში გამოიკვეთა, რომ დიდ უპირატესობას ვფლობდით ძალისმიერ თამაშში, კარგად ვშლიდით ბურთს და ხაზის მოთამაშეები მანძილის მოგებას ახერხებდნენ, გმირულად ვიდექით დაცვაში, მაგრამ სიჩქარისა და ნერვიულობის ფონზე მოგვდიოდა შეცდომები, ვაგებდით რაქებს.

მეორე ტაიმი პირველივით კარგად დაიწყო. აბჟანდაძემ და დემურ თაფლაძემ მარჯვენა ფლანგზე ხაზი ორჯერ გაჭრეს, ბურთი მარცხნივ დაბრუნდა, ლეშკაშელმა მბოჭავი ჩამოიცილა და ლელომდე ირბინა. იაპონელებმა მალევე გვიპასუხეს, სისწრაფეში ხაზი გაჭრეს და რადგან გარდასახვაც ზუსტი იყო, ჩამორჩენა 10 ქულამდე შეამცირეს. პასუხად გამოვიყენეთ მძლავრი იარაღი მოლი და ჩვენი ნახევრიდან მეტოქის 22-მდე ვიარეთ, ჯარიმა აუტში გადავიტანეთ და ამჯერად მოლში იმდენი მეტოქე შევიდა, რომ ფლანგი უყურადღებოდ დარჩა. ეს საბა ხურცილავამ შენიშნა, დაუცველ მოკლე ფრთაზე შეუტია და ლელოში დაამიწა.

იაპონიამ კვლავ გარდასახული ლელოთი გვიპასუხა, მაგრამ ქართულმა მოლმა მათ ხასიათი ერთხელაც წაუხდინა - 55-ე წუთზე მოლს ბექა ყორიაული მოწყდა და ლელომდე ცოტა დააკლდა, დაკარგული ბურთი მალევე დავიბრუნეთ და მოკლე დარტყმებით მცველები დავამუშავეთ, ბურთი ხაზზე გავშალეთ და ლევან ნარიმანიძის ლელო გიორგი ასათიანმა გარდასახა. უმცროსი ბორჯღალოსნები არ მოეშვნენ და მალე ცენტრთან დანიშნული შერკინებიდან კლასიკური შეტევა განახორციელეს, მეტობა კარგად გაითამაშეს და კონსტანტინე მარჯანიშვილმა ქართველთა მეექვსე ლელო მიითვალა, ხოლო ასათიანმა გარდასახა. საქმე გაკეთებული იყო, მატჩი დასასრულს უახლოვდებოდა და კარის წინ დანიშნული ჯარიმით ანგარიშს საბოლოო სახე მივეცით - 42:17.

ამრიგად, 15 აპრილს საფრანგეთს ზედიზედ მესამედ ფინალში ვეთამაშებით, რომელმაც პორტუგალია 47:0 დაამარცხა.

ქართველი მსაჯები

რაგბი ევროპის ღია ჩემპიონატზე ორი ქართველი მსაჯი მუშაობს და მეორე ტურში ორივე მატჩის რეფერი იყო. ნიკა ამაშუკელმა აშშ-სა და ესპანეთის შეხვედრა იმსაჯა, ხოლო შოთა თევზაძემ ბელგია-კანადა. მეოთხედფინალში თევზაძემ საფრანგეთისა და ესპანეთის მატჩი იმსაჯა, ხოლო ამაშუკელი კიდეზე იდგა.

რაგბი ევროპის 18-წლამდელთა ღია ჩემპიონატი

11 აპრილი. ნახევარფინალი

საქართველო - იაპონია 42:17 (15:3)

საქართველო: 15. გიორგი ასათიანი, 14. კონსტანტინე მარჯანიშვილი, 13. დემურ თაფლაძე, 12. ლაშა ლომიძე, 11. ოთარ ძაგნიძე, 10. თედო აბჟანდაძე, 9. საბა ხურცილავა; 1. ლუკა ჭელიძე, 2. სოსო ჭყოიძე, 3. ლუკა აზარიაშვილი, 4. ლუკა გელაშვილი, 5. საბა ჯღარკავა, 6. რატი ჟორჟოლიანი (კაპ.), 7. ბექა ყორიაული, 8. გიგი ლეშკაშელი.

მარქაფა: 16. გიორგი ახალაძე, 17. ვანო კარკაძე, 18. გია ხარაიშვილი, 19. ნიკა წივწივაძე, 20. კობა კოლოტაური, 21. მიხეილ ალანია, 22. რევაზ ხარაზიშვილი, 23. ლევან ნარიმანიძე, 24. ირაკლი სიმსივე, 25. იოანე იაშაღაშვილი, 26. გოჩა ჩანადირი.

სამწვრთნელო შტაბი: დავით ჩავლეიშვილი - მთ. მწვრთნელი, ლევან შარვაშიძე - მწვრთნელი, მიხეილ სუჯაშვილი - მწვრთნელი, მამუკა ტყეშელაშვილი - მწვრთნელი, გივი ნადარეიშვილი - ფიზ. მწვრთნელი, სერგო ბერიაშვილი - ექიმი, გიორგი სვანიძე - ფიზიო, დავით რამიშვილი - ვიდეოანალიტიკოსი, მალხაზ დავითაშვილი - ფსიქოლოგი, ზაზა ლეჟავა - რაგბის აკადემიის ხელმძღვანელი, პაატა მაისურაძე - მენეჯერი

6 ლელო: ძაგნიძე, ლეშკაშელი (2, 3), ხურცილავა, ნარიმანიძე, მარჯანიშვილი

3 გარდასახვა: აბჟანდაძე, ასათიანი (2)

2 ჯარიმა: აბჟანდაძე, ასათიანი

საქართველოს რაგბის კავშირის პრესსამსახური