კვირას, ჩვენი დროით 17 საათზე ბორჯღალოსნები რუმინეთის ნაკრებს 2017 წლის რაგბი ევროპის ჩემპიონობისთვის და „მუხებთან“ საზიარო „ანთიმოზ ივერიელის თასისთვის“ ბუქარესტის სტადიონ „არკულზე“ შეერკინებიან.

საქართველოს ნაკრები ბუქარესტში დღეს გამთენიისას გაემგზავრა, ადგილზე ჩასვლიდან რამდენიმე საათში კი რუმინეთის რაგბის კავშირის ოფისში „მუხებთან“ ერთობლივი პრესკონფერენცია გამართეს. მასში ბორჯღალოსნების მთავარი მწვრთნელი მილტონ ჰეიგი და გუნდის ვიცე-კაპიტანი გიორგი ნემსაძე მონაწილეობდნენ, რუმინელთა მხრიდან - ასევე მთავარი მწვრთნელი ლინ ჰოუელსი და კაპიტანი მიხაი მაკოვეი.

მილტონ ჰეიგი, საქართველოს ნაკრების მთავარი მწვრთნელი: „მიხარია, რუმინეთს რომ ვსტუმრობ. აქ ტრადიციად ქცეული თამაში გველის - რუმინელებისა და ქართველების ყოველი შეხვედრა დაძაბულ გამოდის და კვირასაც ასე იქნება. ორივე გუნდში თაობათა ცვლა მიმდინარეობს, მრავლად არიან ახალგაზრდები, ეს თამაში მათთვის განსაკუთრებით საინტერესო გამოცდილება იქნება. მოუთმენლად ველით კვირის თამაშს, რომელიც რაგბი ევროპის ჩემპიონატის გამარჯვებულს გამოავლენს. რამდენიმე დღით ადრე ჩამოვედით, რათა კარგად დავისვენოთ და ხარისხიანი კაპიტნის ვარჯიში ჩავატაროთ“.

გიორგი ნემსაძე, საქართველოს ნაკრების ვიცე-კაპიტანი: „უმნიშვნელოვანესი თამაში გველის და წარმატებისთვის ყველაფერს გავიღებთ“.

ლინ ჰოუელსი, რუმინეთის ნაკრების მთავარი მწვრთნელი: „საქართველოსთან მატჩი ყოველთვის გამორჩეულია და არც მომავალი თამაში იქნება ამ მხრივ გამონაკლისი. საქართველომ მსოფლიო თასზე თამაში უკვე გაინაღდა, ჩვენ კი ამ უფლებისთვის ჯერ კიდევ დიდი ბრძოლის გადატანა მოგვიწევს. 7 წელია, ქართველები არ დაგვიმარცხებია და დარწმუნებული ვარ, კვირას დიდი ბრძოლა და კარგი თამაში იქნება“.

მიხაი მაკოვეი, რუმინეთის ნაკრების კაპიტანი: „საქართველო განსაკუთრებული მეტოქეა, თუმცა ჩვენ კარგად მოვემზადეთ და მხოლოდ გამარჯვებაზე ვფიქრობთ. წარმატების მისაღწევად მაქსიმუმს გავიღებთ და იმედია, ქომაგი გაწბილებული არ დარჩება. დაე უძლიერესმა გაიმარჯვოს“.