ხვალ გამთენიისას ბორჯღალოსნები გეზს ბუქარესტისკენ აიღებენ, სადაც 19 მარტს რუმინეთის ნაკრების წინააღმდეგ 2017 წლის რაგბი ევროპის ჩემპიონატის ფინალურ მატჩს გამართავენ.

ბოლო ტურის წინ ბორჯღალოსნები სატურნირო ცხრილს 18 ქულით ლიდერობენ, ხოლო ‘მუხები’ 15 ქულით მეორეზე არიან. ამრიგად, რაგბი ევროპის ჩემპიონატის მოსაგებად და რუმინეთთან საზიარო “ანთიმოზ ივერიელის თასის” შესანარჩუნებლად ფრეც გვაძლევს ხელს.

რუმინეთში გამგზავრებამდე ბორჯღალოსნებმა შევარდენის სანაკრებო ბაზაზე 40-წუთიანი ღია ვარჯიში გამართეს, რომლის შემდეგაც მომავალ მატჩზე ნაკრების წევრებმა გიორგი ნემსაძემ და მერაბ შარიქაძემ, ასევე მწვრთნელმა ლევან მაისაშვილმა ისაუბრეს.

გიორგი ნემსაძე: „რაგბი ევროპის ჩემპიონატის სხვა მონაწილეებს არ ვაკნინებ, თუმცა ფაქტია, აქ რუმინეთი ჩვენთვის გამორჩეული მეტოქეა. რუმინელები ამბობენ, რომ იციან როგორ უნდა გვაჯობონ და პირდაპირ აცხადებენ - მოვიგებთო. მათ უძლიერესი შემადგენლობა შეკრიბეს და უნდათ შარშანდელი მარცხის გამო რევანში აიღონ. ჩვენ წინასწარი საუბრისგან ყოველთვის თავს ვიკავებდით და ახლაც ასე ვიტყვი - გავალთ მოედანზე და გამარჯვებისთვის ვიბრძოლებთ, ხოლო შედეგი 80 წუთის შემდეგ გახდება ცნობილი“.

მერაბ შარიქაძე: „წინ ფინალის ტოლფასი, რთული თამაში გველოდება. რუმინელები დიდი მონდომებით ემზადებიან და როგორც პრესასთან ამბობენ, აქვთ შანსი, რომ ექვსწლიანი მოუგებელი სერია შეწყვიტონ. ჩვენც ვემზადებით და გუნდში დაძაბულობაც იგრძნობა. იმედია მოვახერხებთ სასურველი თამაშის ჩვენებას და გამარჯვებას. პროგნოზებს არასდროს ვაკეთებ, თუმცა გულშემატკივარს შემიძლია დავპირდე, რომ მოედანზე მაქსიმუმს დავდებთ და ვნახოთ ეს რა შედეგის მომტანი იქნება“.

ლევან მაისაშვილი: „რაგბი ევროპის ჩემპიონატზე ეს ჩვენი ბოლო კვირაა და თამაშისთვის კარგად მოვემზადეთ. მარტივი თამაში არ გვექნება. რუმინელები ჩვენს დასახვედრად დიდი მონდომებით ემზადებიან და მაქსიმუმს გავიღებთ, რათა შინ გამარჯვებულები დავბრუნდეთ. ყველა ძლიერ მხარეს გამოვიყენებთ, რაც თამაშის მოსაგებად იქნება საჭირო. ბიჭები მზად არიან და შეხვედრას სრულად მობილიზებული ვხვდებით“.