როგორც ცნობილია, საქართველოს ნაკრების მესამეხაზელმა ლაშა ლომიძემ თავის ფრანგულ კლუბთან კონტრაქტი გაწყვიტა. 24 წლის მორაგბე პრო დ2-ში მოასპარეზე „ბეზიეს“ ღირსებას იცავდა, მაგრამ უკმაყოფილო იყო, რომ მაინცდამაინც დიდად არ ენდობოდნენ და არცთუ ხშირად ათამაშებდნენ. ლაშა კლუბის უფროსობას შეხვდა, აუხსნა, რომ ასეთ პირობებში ნაკრებისთვის შესაბამისი კონდიციების შენარჩუნებას ვერ შეძლებდა და კონტრაქტიც ორმხრივი შეთანხმების საფუძველზე გაუქმდა.

ცნობილი ისიც იყო, რომ ლომიძე მომავალ სეზონს მთავარი ფრაგული ლიგის კლუბში დაიწყებდა - „მონპელიეში“, რომლის ესპუარებში ოდესღაც ორი სეზონი გაუტარებია. თუმცა, ამას ოფიციალურად არცერთი წყარო არ ადასტურებდა.

და აი, ფრანგულ სარაგბო საიტზე Rugby Transferts გამოქვეყნებულ ნიუსში ნათქვამია, რომ საქართველოს ნაკრებში 29 კეპის მომხვეჭი მესამეხაზელი კარიერას ინგლისში გააგრძელებს. „ლონდონ აირიში“ - ასე ეწოდება ლომიძის ახალ კლუბს. ეს უძველესი და დიდი ტრადიციების მქონდე სარაგბო კლუბი XIX საუკუნის ბოლოს ლონდონში მცხოვრებმა ირლანდიელებმა დააარსეს, თუმცა დღეს გუნდი პატარა ქალაქ სანბერიშია ბაზირებული, ხოლო საშინაო მატჩებს რედინგში, ცნობილ არენა „მადეისკიზე“ ატარებს.

„ლონდონ აირიში“ შარშან პრემიერშიპიდან გავარდა, მაგრამ მიმდინარე სეზონს მძლავრად ატარებს - ჩემპიონშიპის რეგულარული ჩემპიონატის დასრულებამდე 4 ტურით ადრე ცხრილს მდევართან 18-ქულიანი უპირატესობით ლიდერობს, ანუ „აირიშმა“ პლეი-ოფში თამაში გაინაღდა. გუნდში მრავლად არიან საკმაოდ ცნობილი მორაგბეები: ინგლისის, ირლანდიის, შოტლანდიის, კანადის, ახალი ზელანდიის, ტონგის, სამოასა და ფიჯის ნაკრებთა მოქმედი თუ ყოფილი წევრები.