საქართველოს ნაკრების მესამეხაზელმა ლაშა ლომიძემ საფრანგეთის პრო დ2 დატოვა. 24 წლის მორაგბე თავისი აწ უკვე ყოფილი კლუბის, „ბეზიეს“ ხელმძღვანელებს შეხვდა. ლომიძემ კონტრაქტის გაწყვეტა მოითხოვა, რადგან კლუბში საკმარისი სათამაშო დრო არ ეძლეოდა. „ბეზიეს“ მესვეურები დათანხმდნენ და ამიერიდან ლაშა ლომიძე „ბეზიეს“ წევრი აღარაა.

როგორც ცნობილია, ლაშა მომავალ სეზონში მთავარ ფრაგულ ლიგას დაუბრუნდება, კერძოდ კი „მონპელიეს“, რომლის ესპუარებში თავის დროზე ორი სეზონი აქვს გატარებული. „ბორჯღალოსანი“ მესამეხაზელის თქმით, ის ეროვნულ ნაკრებს მთელ გამოთავისუფლებულ დროს დაუთმობს და „მონპელიეშიც“ ასე უფრო მომზადებული მივა.

ლაშა ლომიძეს საქართველოს ნაკრებში 27 კეპი დაუგროვდა. მის ანგარიშზე 5 ლელოა. რაც შეეხება „ბეზიეს“, მიმდინარე სეზონის 22 ტურიდან ლომიძე მხოლოდ 10-ში ათამაშეს. ამ 10 მატჩიდან ქართველი მხოლოდ 5-ში იყო სასტარტო შემადგენლობაში, თუმცა 2 ლელოს მითვლისთვის ესეც იკმარა.