დიდი 10-ის მე-14 ტურში ორი მატჩი გაიმართა და ხვალამდე სატურნირო ცხრილის სათავეში „ბათუმი“ მოექცა.

ზღვისპირელები საქართველოს ვიცე-ჩემპიონ „ლოკომოტივს“ „ავჭალაზე“ ეწვივნენ. რკინიგზელებმა თებერვლის დასაწყისში ორივე თამაში დათმეს და პოზიციების დასაბრუნებლად გამარჯვება სჭირდებოდათ. მათ ტაიმი 17:13 მოიგეს და შესვენების შემდეგ ლელო-გარდასახვა მიითვალეს, თუმცა პასუხად 11 ქულა მიიღეს და საბოლოოდ ფრეს დასჯერდნენ - 24:24. ეს მესამე ფრეა დიდი 10-ის მიმდინარე სეზონში და აქედან ორი - „ლოკომოტივის“ მონაწილეობით.

ქუთაისში „ბაგრატს“ თბილისის „არმია“ ეწვია, რომელიც ევსეულისთვის იბრძვის. პირველი ტაიმი არმიელებმა 11:3 მოიგეს, საბოლოოდ 28:8 იმარჯვეს და პრემიალური ქულაც აიღეს. ამრიგად, ამ მომენტისთვის სამ წყვილს თანაბარი ქულები აქვთ - „ბათუმი“ და „აია“ 43-43 ქულით ლიდერობენ, მათ 41-41 ქულით კვალში უდგანან „ლოკომოტივი“ და „ლელო-სარასენსი“, ხოლო „არმია“ და „აკადემია“ 32-32 ქულით მეექვსე-მეშვიდე ადგილებს ინაწილებენ.

ხვალ სამი მატჩია: „ავჭალაზე“ „არმაზი“ „აკადემიას“ ეთამაშება, დიდ დიღომში „ლელო-სარასენსი“ ქუთაისის „აიას“ დაუხვდება, ხოლო გორში „ჯიქი“ ბოლნისის „ყოჩებს“ შეერკინება.

2016/2017 წლების. დიდი 10

XIV ტური

ლოკომოტივი (თბილისი) - ბათუმი (ბათუმი) 24:24

ბაგრატი (ქუთაისი) - არმია (თბილისი) 8:28

26 თებერვალი

არმაზი (თბილისი) - აკადემია (თბილისი)

ლელო-სარასენსი (თბილისი) - აია (ქუთაისი)

ჯიქი (გორი) - ყოჩები (ბოლნისი)