საქართველოს ნაკრებმა ექსპერიმენტული, დიდწილად 20 წლის ბიჭებით დაკომპლექტებული შემადგენლობით გერმანიას მოუგო, რომელმაც, თავის მხრივ, „ევროპის რაგბის“ ჩემპიონატის სტარტზე რუმინეთი დაამარცხა. ქართველებმა ლაღად, დამაჯერებლად და ლამაზადაც კი ითამაშეს და გერმანელები 8 უპასუხო ლელოთი (50:6) უშანსოდ დატოვეს. ამასობაში, რაგბიში სხვა ამბებიც ხდება და სიტუაცია „ბორჯღალოსნების“ თითქოსდა სასიკეთოდ განსხვავებული, ირიბი მიმართულებიდანაც იცვლება.

როგორც ცნობილია, ექვსი ერის ხელმძღვანელობა თავს შორს იჭერს საქართველოს ნაკრების მათ ტურნირში მოხვედრის თაობაზე მიმდინარე პოლემიკისგან - ან თითიდან გამოწოვილ არგუმენტებს იშველიებს, ან, უფრო ხშირად, წაყრუების და დუმილის პოლიტიკას მიმართავს. მაგრამ აქ მეორე მხარეცაა: ქართველთა დამატების იდეის უმთავრესი უარმყოფელი ქვეყნის, იტალიის ნაკრების ბოლოდროინდელმა წარუმატებლობებმა ექვს ერში აპენინელთა გარიცხვის საუბრები შვა. და აი, იტალიის ნაკრების ახალზელანდიელმა თავკაცმა კონორ ო’შიმ გუშინ „თაიმსთან“ ინტერვიუში ისეთი განცხადება გააკეთა, რომელიც წყალს საქართველოს წისქვილზეც ასხამს, არადა ო’შის სიტყვები იდეაში სულ სხვა რამეს ემსახურებოდა.

„თავდაირველად ოთხი ერის თასი იყო, შემდეგ ხუთი ერი გახდა, ახლა ექვსი ერია. გაფართოებისკენ უნდა მივდიოდეთ და არა შემცირებისკენ. იტალია ეკონომიკური სიძლიერის თვალსაზრისით ევროპის მესამე სახელმწიფოა (არათუ საკამათო, არამედ აბსოლუტურად არასწორი შეფასებაა - ს.გ.) და ვფიქრობ, ჩვენს გარიცხვაზე საუბარი უადგილოა. რაგბი უნდა ვითარდებოდეს და იზრდებოდეს. ამისთვის ნებისმიერი საკითხი ერთობლივად უნდა განიხილებოდეს, გადაწყვეტილების მიღება ყოველი მონაწილის სურვილების გათვალისწინებით უნდა ხდებოდეს“, - თქვა კონორ ო“შიმ, ვისმა გუნდმაც 2017 წლის ექვსი ერის სტარტზე საკუთარ მოედანზე ჯერ უელსელებისგან მიიღო მწარე დარტყმა (7:33), ხოლო შემდეგ ირლანდიელებისგან არათუ დარტყმა, არამედ დამცირება და სირცხვილი იგემა - 10:63, ასევე რომში.

აქვე მოგახსენებთ, რომ ასევე ქართველების ხსენების გარეშე, მაგრამ ექვსი ერის გაფართოებაზე „ევროპის რაგბის“ თავკაცი ოქტავიან მორარიუც საუბრობს. კონტინენტური რაგბის რუმინელი ხელმძღვანელი 9 მარტს ექვს ერში ოფიციალურ თხოვნას აფრენს, რათა ექვსი ერის აუტსაიდერსა და „ევროპის რაგბის“ ჩემპიონატის“ გამარჯვებულს შორის საკვალიფიკაციო მატჩი დაწესდეს და დაკანონდეს.

რაღა თქმა უნდა, მორარიუს ექვს ერში გაწევრიანებულ ბობოლებზე არანაირი გავლენა არც არასდროს ჰქონია და წესით არც მომავალში ექნება. „ევროპის რაგბიც“ არანაირ კავშირში არაა ქართველთა და რუმინელთა საოცნებო ტურნირთან. მორარიუს წერილს უფრო სარეკომენდაციო ხასიათი ექნება - თხოვნა, სხვა ქვეყნებსაც მიეცეს ექვს ერში მოხვედრის შანსი. არადა, მოგეხსენებათ, ექვსი ერის პრეზიდენტ ჯონ ფიჰანს ამას წინათ უთქვამს, ჩვენს ჩემპიონატში ცვლილებები 2022 წლამდე არ მოხდებაო.