ქართველმა ბურჯმა ბექა გიგაშვილმა, რომელიც რაგბს სულ რაღაც 5 წელია თამაშობს, ტოპ 14-ის „გრენობლთან“ ორწლიანი კონტრაქტი გააფორმა.

მორაგბემ, რომელსაც სამ დღეში 25 წელი შეუსრულდება, რაგბის თამაში საკმაოდ გვიან, 20 წლის ასაკში დაიწყო. მან იმჟამად საქართველოს პირველი ლიგის გუნდში, ქუთაისის „ბაგრატში“ 6 თვე გაატარა და რუსეთში, მოსკოვის „სპარტაკში“ წავიდა, სადაც ერთი სრული სეზონი ჩაატარა და 17 მატჩში ერთი ლელო გაიტანა.

2014-2015 წლებში გიგაშვილი საქართველოში იყო - უმაღლესი ლიგის „ბათუმის“ შემადგენლობაში ითამაშა, თუმცა მალევე გეზი კვლავ უცხოეთისკენ აიღო და ამჯერად დასავლეთში, საფრანგეთში გაემგზავრა. მან ფედერალ 1-ის „შომბერისთან“ ორწლიანი კონტრაქტი გააფორმა და პირველივე სეზონში გუნდის ლიდერად იქცა.

2015-2016 წლების სეზონში ბექამ „შომბერის“ მაისურით 25 თამაში ჩაატარა, 18 შემთხვევაში სასტარტო შემადგენლობაში იყო და 2 ლელო დადო. მიმდინარე სეზონში მან 12 მატჩში მიიღო მონაწილეობა, ყოველ ჯერზე სასტარტო შემადგენლობაში იყო და ამჯერადაც ორი ლელო მიითვალა. „შომბერიში“ მისი თანაგუნდელები ბექა ბიწაძე და ვაჟა კაპანაძე არიან.

გიგაშვილის დიდი პროგრესი და წარმატებული თამაში ფრანგულ ელიტურ კლუბებს უყურადღებოდ არ დარჩენიათ და ახლახან მან 2-წლიანი კონტრაქტი ტოპ 14-ის „გრენობლთან“ გააფორმა. ქართველი ბურჯი ახალ გუნდს ზაფხულში შეუერთდება და იქ 2019 წლამდე დარჩება.