თამაზ მჭედლიძემ საკუთარ აქტივს პრო დ2-ში მორიგი, მე-5 ლელო მიათვალა. საფრანგეთის რანგით მეორე დივიზიონის მე-20 ტურში მისმა „აჟენმა“ „ბეზიეს“ უმასპინძლა და 23:25 წააგო.

მჭედლიძემ შეუცვლელად ითამაშა, ხოლო ლელო მე-60 წუთზე გაიტანა. 23 წლის უკანახაზელმა ბურთი ლელოსთან ახლოს მიიღო, შებოჭეს, მაგრამ თაზო ხაზს იქით ბურთიანად მაინც გადაგორდა. ამ ლელოთი აჟენელები პირველად დაწინაურდნენ (20:19), მაგრამ უპირატესობა ვერ შეინარჩუნეს - 79-ე წუთზე ჯარიმა გაუშვეს.

როგორც ზემოთ ითქვა, მჭედლიძისთვის ეს მე-5 ლელოა პრო დ2-ის მიმდინარე სეზონში. „აჟენი“ კი ამ მოულოდნელი მარცხის გამო ცხრილის მე-3 საფეხურზე დაქვეითდა.

ლიდერი კი უცვლელია - „ოიონა“, რომელიც „კოლომიეს“ ესტუმრა და 20:30 დამარცხდა. სტუმართა შემადგენლობაში ბურჯმა გიორგი ვეფხვაძემ დასკვნითი 11 წუთი ითამაშა. სწორედ „კოლომიემ“ ჩაანაცვლა „აჟენი“ მეორე საფეხურზე.

„ორიაკმა“ ამჯერად უქართველებოდ ითამაშა და შინ „ანგულემს“ 30:26 მოუგო. სტუმართა შორის მოედანზე 80-ვე წუთი „ბორჯღალოსანმა“ მესამეხაზელმა შალვა სუთიაშვილმა გაატარა.

„დაქსმა“ „ნარბონთან“ საკუთარ მოედანზე 18:22 წააგო, მასპინძელთა შემადგენლობაში დასკვნითი 12 წუთი ვეტერანმა ბურჯმა ელიზბარ ყუფარაძემ ითამაშა.

„ალბიმ“ ასევე შინ წააგო - „ვანთან“ 19:22. ბექა შეყლაშვილი მასპინძელთა სასტარტო შემადგენლობაში იყო, 28-ე წუთზე დაშავდა და შეცვალეს, თუმცა 66-ეზე მოედანზე დააბრუნეს. გამოვიდა, რომ ქართველმა ბურჯმა ჯამში 42 წუთი იბურთავა.

ინგლისში, ავივა პრემიერშიპის მე-14 ტურში ჯაბა ბრეგვაძის „ვუსტერმა“ მნიშვნელოვანი გამარჯვება იზეიმა. ეს გუნდი საკუთარ მოედანზე ჩემპიონთა თასის ამჟამინდელ მფლობელსა და ინგლისის მოქმედ ჩემპიონ „სარასენსს“ 24:18 გაუსწორდა. ქართველი კვაჭი თამაშში 46-ე წუთზე ჩაერთო, ბურთით 2-ჯერ შეუტია და 7 მეტრი მოიგო, ხოლო დაცვაში 4 ბოჭვა შეასრულა.

პრო 12-ის მე-14 ტურში ანტონ ფეიქრიშვილის „კარდიფ ბლუზი“ მოქმედ ჩემპიონს, ირლანდიურ „კონახტს“ დაუხვდა და პირველი ტაიმის მიწურულს 13:0 იგებდა, თუმცა მერე 19 უპასუხო ქულა მიიღო და წააგო. ქართველი ბურჯი სასტარტო შემადგენლობაში იყო და 49 წუთი ითამაშა.