"რაგბი ევროპის" ჩემპიონატის დამდეგ სეზონში ქართულ რაგბს ღირსშესანიშნავი ეტაპი დაუდგა: სულ მალე "ბორჯღალოსნებს" 28-წლიან ისტორიაში პირველი ცენტურიონი - 100 კეპის მქონე მორაგბე ეყოლებათ.

"რაგბი ევროპის" პირველი თამაში თუ საღ-სალამათად ჩაამთავრა, 19 თებერვალს, საქართველო - გერმანიის მატჩზე, "ბორჯღალოსნების" ყველა დროის საუკეთესო მექულე, 15 ნომერი მერაბ კვირიკაშვილი ქართველთაგან პირველი მოიხვეჭს მე-100 სანაკრებო კეპს.

33 წლის მეკომ უკვე 98 ტესტში ირაგბა და გუნდს 766 ქულა მოუტანა. მისი დებიუტი 2003 წელს შედგა, მას აქეთ კი "ლელოს" (ახლა ეწოდება "ლელო-სარასენს") აღზრდილმა ოთხ მსოფლიო თასზე ითამაშა (2003, 2007, 2011, 2015).

ნაკრებში ნამსახურობით მეკოს ოდნავ ჩამორჩებიან შუამარბი დავით კაჭარავა და მესამეხაზელი გიორგი ჩხაიძე, რომლებსაც ამჟამად 96 და 94 კეპი აქვთ.

„ძალიან მიხარია მეკოს ამბავი. ბოლო ხანს მას სერიოზული პრობლემები ჰქონდა, მაგრამ ისინი დაძლია. ქვეყნის პირველი ცენტურიონის წოდება განსაკუთრებულია, ამას მეკოს ვერავინ წაართმევს“, - თქვა მილთონ ჰეიგმა.

„წელიწად-ნახევრის წინ სამივეს ვესაუბრე, თუ რა უნდა გაეკეთებინათ ამ დიადი მიზნის მისაღწევად. აშკარაა, რომ ასაკი ემატებათ და ფორმის შესანარჩუნებლად უწინდელზე მეტი შრომა უწევთ. ჩვენც მეტად გვმართებს მათზე ზრუნვა, მაგრამ ფაქტია, რომ სამივემ ძალიან კარგ შედეგს მიაღწია“.

სხარტი 9 ნომრები

კვირიკაშვილი აგრძელებს ქართული რაგბის აღმასვლისათვის ბრძოლას და ორ წელიწადში იაპონიაში, კარიერის მეხუთე მსოფლიო თასზეც აპირებს თამაშს, ჰეიგი კი ამასობაში ახალგაზრდებზეც ზრუნავს და რამდენიმე ახალბედას “რაგბი ევროპის" ჩემპიონატის დამდეგ ორ სეზონში უპირებს გამოცდას.

ვინაიდან საქართველომ იაპონიის საგზური ჯერ კიდევ ინგლისში დაიბევა ჯგუფში მესამე ადგლის დაკავებით, ჰეიგს შესაძლებლობა აქვს, ნელ-ნელა იმუშაოს ისეთი გუნდის შესაქმნელად, რომელსაც 2019 წელს პლეი-ოფში გასვლა შეეძლება.

"ბორჯღალოსნებს" გამორჩეულად უმართლებთ 9 ნომრებში: ამ პოზიციაზე მსოფლიო თასის ისტორიაში ყველაზე ახალგაზრდა მორაგბეს, ვასილ ლობჟანიძეს ალბათ სერიოზულ კონკურენციას გაუწევს ჯერჯერობით უკეპო, 18 წლის გელა აფრასიძე. ჰეიგი ამ ბიჭს ისე აქებს, რომ მეტი აღარ შეიძლება.

“აფრასიძე ქართულ რეალობაში ყველაზე შემტევი ჰავბექია. იგი ისე არასტანდარტული პიროვნებაა, რომ ახალ ზელანდიაშიც კი ივარგებდა. ცოტა ხნის წინ ზე-რაგბის ზელანდიურ ფრანჩაიზებს - “ბლუზსა” და “ჰარიქეინზს” ვეწვიე საწვრთნელ პროცესზე დასაკვირვებლად და ორივეს ვესაუბრე გელას ზელანდიაში სტაჟირებაზე“, - გაგვიმხილა მილტონმა.

“გელას და ვასოს 10 ნომრად შეუძლიათ თამაში, მაგრამ, ჩემი აზრით, სჯობს ორივე ცხრაზე დავტოვოთ. დროთა განმავლობაში ეს ორი ბიჭი ერთმანეთს ფიცხელ კონკურენციას გაუწევს. საინტერესოა, ბოლოს რომელი აჯობებს. რაც მთავარია, ორივეს რაგბი სისხლში აქვს გამჯდარი“.

მიზანი - მსოფლიო თასი

აფრასიძე ერთერთია იმ 8 უკეპო მორაგბეში, ვისაც მილტონ ჰეიგი "რაგბი ევროპაზე" უპირებს გამოცდას. გელასთან ერთად ამ სიაში მოიაზრება კლერმონელი მესამეხაზელი ოთარ გიორგაძე, რომელმაც ნაკრებში "მსოფლიო რაგბის თბილისის თასზე" ითამაშა. "ოთიასა" და მის ტოლ, კიდევ რამდენიმე ჭაბუკს ეძლევათ შანსი, კიდევ ერთხელ გამოიჩინონ თავი საერთაშორისო ასპარეზზე.

“2016 წელს შემადგენლობაში ბევრი არაფერი შემიცვლია, რადგან ჩემთვის მნიშვნელოვანი იყო შარშანწინ, ინგლისში მიღწეული შედეგის გამყარება“, - აგვიხსნა ჰეიგმა. - “წელს კი მეტი ყურადღება უნდა დავუთმოთ სხვა მოთამაშეებს, სხვადასხვა პოზიციაზე რეზერვის უზრუნველყოფას. ჯერაც ხომ სამი წელი გვაქვს ნაკრების სამუშაო რეჟიმთან ახალბედების ადაპტაციისთვის.

“ჩვენი მთავარი მიზანია “რაგბი ევროპის" ჩემპიონატის მეათედაც (!) მოგება. პარალელურად თუ მოვახერხებთ და რეზერვსაც გავზრდით, კარგი იქნება. ახალბედა მორაგბეებს სწორედ ეს ვუთხარით: თუ ახლა გამოიჩენთ თავს, შეიძლება სამ წელიწადში მსოფლიო თასზე მოხვდეთ“.

საქართველოს რაგბის კავშირის პრესსამსახური