საქართველოს ეროვნული ნაკრების მესამეხაზელი ბექა ბიწაძე მომავალი სეზონიდან საფრანგეთის მეორე ელიტური დივიზიონის, პრო დ2-ის „ნარბონში“ ითამაშებს.

25 წლის მორაგბე საქართველოში თბილისის „არმიასა“ და „ლოკომოტივში“ თამაშობდა. 2015 წელს საფრანგეთის ნახევრადპროფესიული, ფედერალ 1 დივიზიონის კლუბ „შომბერიში“ გადავიდა და გასულ სეზონში ჩატარებულ 22 მატჩში 6 ლელო დაამიწა. მიმდინარე სეზონში მის ანგარიშზე 8 თამაში და ერთი ლელოა, თუმცა გუნდი პირველ ჯგუფში მხოლოდ მე-6 ადგილზეა, პრო დ2-ში დაწინაურების შანსი აღარ აქვს და ნაკრების მოთამაშისთვის კიდევ ერთი სეზონით მესამე დონეზე დარჩენა სახარბიელო ვარიანტად არ ისახებოდა.

ბიწაძეს ეს აღარ მოუწევს, რადგან ნაახალწლევს პრო დ2-ის „ნარბონთან“ 2-წლიანი კონტრაქტი გააფორმა და ახალ სეზონს ახალ გუნდში დაიწყებს. დღეისთვის გუნდს 39 ქულა აქვს და მეორე ელიტური დივიზიონის სატურნირო ცხრილში მე-10 ადგილს იკავებს. მას პრო დ2-ში აღზევების შანსი აღარ შერჩა, თუმცა არც დაქვეითება ემუქრება.

ბექა ბიწაძეს ეროვნული გუნდის კვართით 20 შეხვედრა აქვს ჩატარებული, მის ანგარიშზე 6 ლელოა.