უელსის ნაკრებისა და ინგლისური „ნორთჰემპტონის“ გარემარბი ჯორჯ ნორთი კიდევ ერთხელ დადგა სარაგბო კარიერის ნაადრევად დასრულების საშიშროების წინაშე.

გასულ შაბათს, ინგლისის „ავივა პრემიერშიფში“ „ლესტერთან“ მატჩისას, 24 წლის მორაგბე ადამ ტომპსტოუნთან შეჯახების შემდეგ მოედანზე უგონოდ დაეცა. ვიდეოზე ჩანს, რომ მაღალი ბოჭვის შემდეგ ნორთმა თავი მინდორს დაარტყა და გონება დაკარგა. ის ტვინის შერყევის ტესტის ჩასატარებლად მოედნიდან გაიყვანეს, 5 წუთში კი თამაშში დაბრუნების ნება დართეს.

უკანასკნელ 3 წელიწადში ჯორჯს სამჯერ ჰქონდა ტვინის შერყევა და მისი მეოთხედ მიღების შემთხვევაში, „მსოფლიო რაგბი“ მას მორაგბის კარიერის შეწყვეტის რეკომენდაციას აძლევს. „ლესტერთან“ მატჩის შემდეგ, „ნორთჰემპტონის“ სამედიცინო შტაბი და თავად მორაგბე ირწმუნებიან, რომ ტვინის შერყევა არ მიუღია და მხოლოდ კისერი იტკინა, თუმცა არის ვარაუდი, რომ ისინი განზრახ ცრუობენ.

უახლოეს პერიოდში „ავივა პრემიერშიპისა“ და „ნორთჰემპტონის“ ხელმძღვანელობა ინციდენტის ერთობლივ შესწავლას გეგმავს, მანამდე კი, ნორთს დასვენება მოუწევს.