26-27 ნოემბერს თბილისში, „შევარდენის“ სანაკრებო ბაზაზე გაიმართა თბილისის სარაგბო ფესტივალის ფინალური ეტაპი, სადაც მონაწილეობა მიიღო 2002-2003 წლებში დაბადებულ მოზარდთა 16-მა გუნდმა. ფესტივალში მონაწილეობნენ საქართველოს სხვადასხვა რეგიონის წარმომადგენლები და თბილისის გუნდები - „ლელო-სარასენსი“, „წიქარა“, „არმაზი“, „ჩოხოსნები“, „თბილისი“, „აკადემია“, „ხვამლი“, „ლოკომოტივი“, რუსთავის „ხარები“, პატარძეულის „ვეფხვები“, ქუთაისის „აია“, თელავის „კახელები“, ბოლნისის „ყოჩები“, გორის „ჯიქი“, ჩაქვის „პონტო“.

პირველ დღეს გაიმართა ჯგუფური ეტაპი. მეორე დღეს გუნდებმა გააგრძელეს ასპარეზობა პლეი-ოფის სისტემით. თამაშებმა ლამაზ და სანახაობრივ ბრძოლაში ჩაიარა, სტადიონზე მისულმა რამდენიმე ასეულმა მაყურებელმა ბევრი ლამაზი ლელო იხილა. ნახევარფინალში „თბილისმა“ დაამარცხა „აია“, ხოლო „ხვამლმა“ – „ლელო-სარასენსი“. მცირე ფინალი „ლელო-სარასენსის“ გამარჯვებით დასრულდა, ხოლო ფინალში „ხვამლმა“ დაძაბულ და სანახაობრივ ბრძოლაში 12:5 დაამარცხა „თბილისი“.

ტურნირმა რამდენიმე პერსპექტიული ახალგაზრდაც გამოავლინა, რომლებიც სარაგბო აკადემიის მწვრთნელთა ყურადღების სფეროში მოექცნენ. ტურნირის საუკეთესო მელელოვე გახდა „ლელო-სარასენსის“ მორაგბე გიორგი ქობალია, ხოლო საუკეთესო მოთამაშის პრიზი - საქართველოს ნაკრების სათამაშო მაისური, რომელიც „ბორჯღალოსნების“ მე-10 ნომერმა ლაშა ხმალაძემ დააწესა, გადაეცა ხვამლის მოთამაშე დათო ნინიაშვილს. თუმცა, ორგანიზატორებმა არც სხვა ნორჩი მონაწილეები დატოვეს უყურადღებოდ და ყველა მათგანს სამახსოვრო სიგელი გადასცეს.

საქართველოს რაგბის კავშირის განვითარების ჯგუფი