“ბორჯღალოსნების” მორიგი მეტოქის თავკაცის, ვერნ კოტერის ერთ-ერთმა ასისტენტმა რიჩი გრეიმ (“ტულუზისა” და შოტლანდიის ნაკრების შერკინების მეორეხაზელ სეხნია-მოგვარეში არ აგერიოთ – ავტ.) პოპულარულ ბრიტანულ გაზეთ “სქოთსმენის” სარაგბო მიმომხილველ დანკან სმითთან საუბარში საქართველოს ნაკრებთან მომავალ მატჩზე თქვა, არგენტინასთან და ავსტრალიასთან თამაშებზე არანაკლებ მძიმე ჯახი გველისო. რიჩი გრეი სარაგბო წრეებში ცნობილი და ავტორიტეტული კაცია, სამხრეთაფრიკელთა სამწვრთნელო შტაბში უმუშავია, ქართველებსაც იცნობს – ოდესღაც რიჩი დიქსონისთვის გაუწევია გარკვეული პროფესიული დახმარება. გთავაზობთ ინტერვიუს ნაკვესებს – ყველაფერს, რაც კი “ბორჯღალოსნებსა” და შაბათს კილმარნოკში გასამართ დაპირისპირებას შეეხება.

“თუკი ვინმეს ჰგონია, რომ საქართველოს ნაკრები საუკეთესო ვარიანტია იმისთვის, რათა შოტლანდიამ ნოემბრის ტესტები მაჟორული აკორდით დაასრულოს, მწარედ ცდება – გინდ არგენტინა-ავსტრალიას შეხვედრიხართ და გინდ - საქართველოს”. ეს რიჩი გრეის მოსაზრებაა, ვისაც ქართველებთან მუშაობის გამოცდილება აქვს.

“მათთან ერთად 2-3 დღე დავყავი, როცა რიჩი დიქსონი ქართველთა ნაკრებს 2011 წლის მსოფლიო თასზე საბრძოლველად ამზადებდა”, - თქვა შოტლანდიელმა სპეციალისტმა.

“ესაა ხარისხიან მოთამაშეთა ჯგუფი. ნაკრებში შემთხვევით არცერთი მათგანია მოხვედრილი. მათი უმრავლესობა ფრანგული ტოპ 14-ის საკვანძო მოთამაშეა, განსაკუთრებით ფორვარდები. გადახედეთ მათ შედეგებს ბოლო მსოფლიო თასზე, შედეგებს ბოლო 12 თვის ტესტ-მატჩებში – არავისზე ნაკლები გუნდია”.

12 ნოემბერს საქართველო საკუთარ მოედანზე იაპონიასთან 22:28 დამარცხდა, და ეს ამ გუნდის ერთადერთი მარცხია მას მერე, რაც მსოფლიო თასზე ტონგასა და ნამიბიას მოუგო, ხოლო გასულ უიქ-ენდზე ქართველებმა სამოა დასცეს – 20:16.

რიჩი გრეი სპორტსმენობისას შოტლანდიის პრემიერლიგაში მოასპარეზე “გალას” კაპიტანი იყო, ხოლო მოგვიანებით სამხრეთ აფრიკის ნაკრებში რაქში თამაშის კონსულტანტად მუშაობდა. ამჟამად ეს სპეციალისტი შოტლანდიის ნაკრებთანაა კონტრაქტით დაკავშირებული და ვერნ კოტერს გუნდის 6 ერის მატჩებისთვის მომზადებაში ეხმარება. რიჩის მოლოდინის თანახმად, შაბათის ტესტი მორიგ ბრუტალურ დაპირისპირებად იქცევა.

“ფიზიკურად ძალიან, ძალიან ძლიერები არიან, მრისხანე გუნდია. ნახეთ, რა უქნეს სამოას? ძვლები დაუნაყეს. ჩვენთვის ეს იქნება ისეთივე ხისტი შერკინება, როგორც ავსტრალიასთან და არგენტინასთან. ძალიან კარგი გუნდია და მატჩისთვის სათანადოდ უნდა მოვემზადოთ”.

საქართველომ ზედიზედ მეექვსედ მოიგო ევროპის ერთა თასი, შემდეგ კი წყნარი ოკეანისკენ გასწია ტურნეზე, სადაც ფიჯი და ტონგა დაამარცხა, ხოლო სამოასთან თამაში ფრედ დაასრულა.

ქართველებმა ევროპულ რაგბის ერთ-ერთი კაშკაშა ვარსკვლავი აჩუქეს – “ტულონის” ფლანკერი მამუკა გორგოძე. რიჩი გრეიმ იცის, რომ მათი მიზანი 6 ერთან გაერთიანებაა და შოტლანდიასთან თამაში ამ კონტექსტში საქართველოს ნაკრების შანსია.

“ამაზე საუბრები ყოველთვის იყო და ახლა ის მომენტია, როცა შეჯამდება, თუ რა გააკეთეს ქართველებმა ბოლო 1 წლის განმავლობაში. ისინი ეცდებიან, ამ გადამწყვეტ მომენტში ყველაფერი გაიღონ, რათა რჩეულთა მაგიდას დამსახურებულად მიუსხდნენ. ესაა ძალიან კარგი გუნდი.

მათ გორგოძის დონის მორაგბეები ჰყავთ. მაგალითად, პირველი ხაზის მორკინალი ქუბრიაშვილი და მისი ტიპის სხვა მოთამაშეები. ისინი კვალიფიციური მორაგბეები არიან და ეჭვგარეშეა, შაბათს უმძიმესი ტესტი გვექნება”, - დასძინა რიჩი გრეიმ.

სლავა გასპაროვი