საქართველოს მორაგბეთა ნაკრების კაპიტანმა მამუკა გორგოძემ სამოასთან მატჩი ჟურნალისტებთან შეაფასა. ქართველი მორაგბე დღევანდელი მსაჯობით გაკვირვვებული იყო. მანვე გულშემატკივარს პირობა მისცა, რომ სანამ ისინი ასე მხურვალედ უქომაგებენ, ნაკრებიც შესაბამისად, მაგრად ითამაშებს. მამუკამ შოტლანდიასთან მოახლოებული ტესტის შესახებაც გააკეთა კომენტარი.

“მსაჯებზე საუბარი არ მიყვარს, მაგრამ შერკინების დროს მინიმუმ ორჯერ ეკუთვნოდათ ყვითელი ბარათი. საფრანგეთში ამაზე აუცილებლად მისცემდნენ და გამიკვირდა მსაჯის საქციელი, რადგან ისიც ფრანგი იყო და საფრანგეთის ჩემპიონატს მსაჯობს. ალბათ, საჯარიმო ლელოს მერე სამოელების მიმართ უფრო ლმობიერი გახდა, არ ვიცი.

შოტლანდია ძლიერი გუნდია, ძლიერი მწვრთნელით. ყველამ ნახეთ ავსტრალიასთან როგორც ითამაშეს და უდაო ფავორიტები არიან. სამწუხაროა იაპონიასთან, რომ წავაგეთ. რადგან ორი მოგებით უფრო მეტად მოტივირებუი ვითამაშებდით. ამ შეხვედრაში რაშიც ვართ ძლიერები იმას გამოვიყენებთ – მოლს, შერკინებას და მეტოქეს არაფერს დავუთმობთ.

განსაკუთრებული მადლობა გულშემატკივარს. მიუხედავად იმისა, რომ წინა მატჩი წავაგეთ, სტადიონი მაინც გაივსო დღეს. ქუჩაში ვინც გვხვდებოდა ყველა გვამხნევებდა და გვეუბნებოდნენ, არაუშავს ბიჭებოო. სანამ ასეთი გულშემატკივარი იარსებებს, ჩვენც ასე მაგრად ვითამაშებთ.” - თქვა გორგოძემ.

სოფო ერქვანია