საქართველოს ეროვნული ნაკრების კაპიტანმა მამუკა გორგოძემ, საფრანგეთის ტოპ 14-ის მიმდინარე სეზონში მეორე ლელო დადო.

მისი, ლევან ჩილაჩავასა და ბადრი ალხაზაშვილის „ტულონმა“ „გრენობლი“ 42:12 დაამარცხა და პრემიალური ქულაც ჩაიწერა. ამაში ქართველი ლეგიონერების წვლილი უდიდესია. გორგოძემ შერკინების მეორე ხაზში სრულად ითამაშა და ლელო 36-ე წუთზე დადო. მან ფლანგზე მიიღო ბურთი და აბა ერთი მცველი რაღას შეაჩერებდა.

სასტარტო შემადგენლობაში იყო ჩილაჩავა, მოედანზე 58-ე წუთამდე იყო და ამ დროში „ტულონმა“ ორჯერ გამოიმუშავა საჯარიმო ლელო, რაშიც მისი წვლილი დიდია. სულ „ტულონმა“ მეტოქეს 6 ლელო დაუდო და ორი მიიღო. ქართველების გუნდს ტოპ 14-ში ოთხი წაუგებელი თამაში მოუგროვდათ, აქედან სამში გამარჯვება მოიპოვეს, ერთი ფრედ დაასრულეს და სატურნირო ცხრილში მინიმუმ ხვალამდე პირველ ადგილზეა.

ზურა ქსოვრელი